Cyrus Mistry death reason : టాటా సన్స్ మాజీ ఛైర్మన్, ప్రముఖ పారిశ్రామికవేత్త సైరస్ మిస్త్రీ(54) కారు ప్రమాదంపై కీలక నివేదిక రూపొందించింది లగ్జరీ కార్ల తయారీ సంస్థ మెర్సిడెజ్ బెంజ్. మహారాష్ట్ర పాల్ఘర్ పోలీసులకు అందజేసిన ఈ మధ్యంతర నివేదికలో.. దుర్ఘటనకు ముందు పరిస్థితుల్ని వివరించింది. కారులోని ఎలక్ట్రానిక్ కంట్రోల్ మాడ్యూల్ను విశ్లేషించి ఈ విషయాలు తెలుసుకున్నట్లు మెర్సిడెజ్ బెంజ్ సంస్థ తెలిపింది.
బెంజ్ కంపెనీ ఇచ్చిన నివేదికలోని కీలకాంశాలు:
- ప్రమాదానికి కొద్ది సెకన్ల ముందు సైరస్ మిస్త్రీ ప్రయాణిస్తున్న కారు గంటకు 100 కిలోమీటర్ల వేగంతో ప్రయాణిస్తోంది.
- డివైడర్ను ఢీకొట్టడానికి కచ్చితంగా ఐదు సెకన్ల ముందు బ్రేకులు వేశారు.
- సూర్యా నది వంతెనపై ఉన్న డివైడర్ను ఢీకొట్టే సమయంలో కారు వేగం గంటకు 89 కిలోమీటర్లు.
- క్రాష్ జరిగిన వెంటనే కారులోని నాలుగు ఎయిర్ బ్యాగ్స్ తెరుచుకున్నాయి. ఇందులో మూడు డ్రైవర్ సీట్ వద్ద ఉండగా, మరొకటి పక్కన ఉంది.
ప్రమాదానికి గురైన కారు.. ప్రస్తుతం ఠాణే హీరానందనిలో తమ షోరూమ్లో ఉన్నట్లు మెర్సిడెజ్ బెంజ్ ప్రతినిధులు తెలిపారు. అందులోని ఎలక్ట్రానిక్ కంట్రోల్ మాడ్యూల్(ఈసీఎం)ను విశ్లేషించి ఈ నివేదిక రూపొందించినట్లు వివరించారు. దర్యాప్తులో పోలీసులు, సంబంధిత అధికారులకు పూర్తిగా సహకరిస్తున్నట్లు స్పష్టం చేశారు. ఈనెల 12న హాంగ్కాంగ్ నుంచి నిపుణుల వచ్చి, ప్రమాదానికి గురైన కారును క్షుణ్నంగా పరిశీలిస్తారని బెంజ్ కంపెనీ ప్రతినిధులు వెల్లడించారు. ఆ తర్వాత పోలీసులకు సమగ్ర నివేదిక అందజేస్తామని చెప్పారు.
ఏంటీ ఈసీఎం?
మెర్సిడెజ్ బెంజ్ వంటి హైఎండ్ కార్లలో ఎలక్ట్రానిక్ కంట్రోల్ మాడ్యూల్ ఉంటుంది. ఏదైనా ప్రమాదం జరిగినప్పుడు.. బ్రేకులు ఫెయిల్ అయ్యాయా? బ్రేక్ ఫ్లూయిడ్ సరిపడా లేదా? వంటి సాంకేతిక అంశాలను తెలుసుకునేందుకు ఈసీఎంలోని సమాచారం ఉపయోగపడుతుంది. సైరస్ మిస్త్రీ ప్రయాణిస్తున్న కారులోని ఈసీఎంను బెంజ్ ప్రతినిధులు విశ్లేషించి, ఆ వివరాలను పోలీసులకు అందజేశారు.
Cyrus Mistry death news : సైరస్ మిస్త్రీ, ప్రముఖ గైనకాలజిస్టు అనాహితా పండోల్‌, ఆమె భర్త డేరియస్‌ పండోల్‌, ఆయన సోదరుడు జహంగీర్ పండోల్‌ ఆదివారం కారులో అహ్మదాబాద్‌ నుంచి ముంబయి వస్తుండగా పాల్ఘర్ జిల్లాలో ప్రమాదం జరిగింది. అప్పుడు కారును అనాహితా నడుపుతున్నారు. ఈ ఘటనలో సైరస్, జహంగీర్ అక్కడికక్కడే ప్రాణాలు కోల్పోయారు. మిగిలిన ఇద్దరు తీవ్రంగా గాయపడ్డారు.
