మేఘాలయ నూతన ముఖ్యమంత్రిగా నేషనల్ పీపుల్స్ పార్టీ(ఎన్పీపీ) అధ్యక్షుడు కాన్రాడ్ సంగ్మా మంగళవారం రెండోసారి ప్రమాణ స్వీకారం చేశారు. ఈ కార్యక్రమానికి ప్రధాని మోదీ, కేంద్ర హోం మంత్రి అమిత్ షా, బీజేపీ జాతీయ అధ్యక్షుడు జేపీ నడ్డాతో పాటు అసోం ముఖ్యమంత్రి హిమంత బిశ్వ శర్మ హాజరయ్యారు. రాజధాని షిల్లాంగ్లోని రాజ్భవన్లో ఈ ప్రమాణ స్వీకార వేడుక జరిగింది. గవర్నర్ ఫాగు చౌహాన్ ముఖ్యమంత్రితో సహా 12 మంది మంత్రులతో ప్రమాణస్వీకారం చేయించారు. బీజేపీ నుంచి అలెగ్జాండర్ లలూ హెక్ మంత్రివర్గంలో చోటు దక్కించుకున్నారు.
గతనెల 27న మేఘాలయలో జరిగిన ఎన్నికల్లో అధికార ఎన్పీపీ 26 స్థానాల్లో గెలుపొందింది. ప్రభుత్వ ఏర్పాటుకు మరో నాలుగు సీట్ల అవసరం కాగా బీజేపీ, యూడీపీ, హెచ్ఎస్పీడీపీతో కలిసి సంకీర్ణ ప్రభుత్వాన్ని ఏర్పాటు చేసింది. సంగ్మా మంత్రివర్గంలో ఎన్పీపీ నుంచి ఏడుగురు ఎమ్మెల్యేలు, ప్రతిపక్ష పార్టీలైన యూడీపీ నుంచి ఇద్దరు, బీజేపీ, హెచ్ఎస్పీడీపీ నుంచి చెరో ఎమ్మెల్యే సంగ్మా మంత్రివర్గంలో సభ్యులుగా ప్రమాణం చేశారు.
ఎన్‌పీపీకి చెందిన ప్రెస్టోన్ టైన్సాంగ్, స్నియావ్‌భాలంగ్ ధార్ ఎమ్మెల్యేలిద్దరూ ఆ రాష్ట్ర ఉపముఖ్యమంత్రులుగా ప్రమాణం చేశారు. మార్కుస్ ఎన్ మారక్, రాక్కం ఎ సంగ్మా, అంపరీన్ లింగ్డో, రాబోన్ వైంబన్, ఏటి మొండల్ క్యాబినెట్ మంత్రులుగా ప్రమాణ స్వీకారం చేశారు. బీజేపీ నుంచి ఎ ఎల్ హెక్, యూడీపీ నుంచి పాల్ లింగ్డో, కైర్మెన్ షల్లా, అలాగే హెచ్‌ఎస్‌పీడీపీకి చెందిన షక్లియార్ వార్జ్రీ కూడా మంత్రులుగా ప్రమాణ స్వీకారం చేశారు.
కాగా, ఈశాన్య రాష్ట్రాలైన మేఘాలయ, త్రిపుర, నాగాలాండ్లో జరిగే ముఖ్యమంత్రుల ప్రమాణ స్వీకార కార్యక్రమాలకు హాజరయ్యేందుకు రెండు రోజుల పాటు అక్కడే పర్యటించనున్నారు మోదీ. అనంతరం అసోంలో నిర్వహించే కేబినెట్ సమావేశానికి హాజరవుతారు. అంతకుముందు దిల్లీ నుంచి గువాహటికి చేరుకున్న మోదీ అసోం గవర్నర్ చంద్ కటారియా, ఆ రాష్ట్ర సీనియర్ కేబినెట్ మంత్రులను మర్యాదపూర్వకంగా కలిశారు. అనంతరం ముఖ్యమంత్రి హిమంత బిశ్వ శర్మతో కలిసి సోమవారం మేఘాలయకు చేరుకున్నారు. దీంతో ప్రధాన మంత్రి నరేంద్ర మోదీ ఈశాన్య పర్యటన మంగళవారం ప్రారంభమైంది.
మార్చి 8న నాగాలాండ్లో ముఖ్యమంత్రి నీఫు రియో ప్రమాణ స్వీకార కార్యక్రమానికి హాజరవుతారు మోదీ. అనంతరం త్రిపురలో ముఖ్యమంత్రి మానిక్ సాహా ప్రమాణ స్వీకార కార్యక్రమానికి కూడా వెళ్తారు. ఇందుకోసం ఆయన బుధవారం అగర్తాలాకు బయలుదేరతారు.
