కరోనా రెండో దశ వ్యాప్తితో దేశం గడగడలాడిపోతోంది. వైరస్ విజృంభణకు ఆరోగ్యంగా ఉన్న యువతే బెంబేలెత్తిపోతుంటే.. కొంత మంది వృద్ధులు మాత్రం తమ మనోబలంతో వైరస్ను తరిమికొడుతున్నారు. వారి సంకల్పం ముందు మహమ్మారి తోక ముడుచుకుని పారిపోతోంది. వైరస్ను ఎదుర్కోవడంలో ఇతరులకు ఆదర్శంగా నిలుస్తున్న అలాంటి కొందరి విజయగాథలను ఇప్పుడు చూద్దాం.
రామనవమి రోజున పునర్జన్మ..
మధ్యప్రదేశ్లోని ఉజ్జయిన్కు చెందిన 96 ఏళ్ల శాంతి భాయ్ అనే బామ్మకు ఇటీవల కరోనా నిర్ధరణ అయింది. దాంతో ఆమె ఏప్రిల్ 8న ఇందోర్లోని ఇండెక్స్ వైద్య కళాశాలలో చేరారు. వైరస్ ఆమె ఊపిరితిత్తుల్లోకి వైరస్ 80 శాతం మేర వ్యాపించింది. పరిస్థితి విషమించగా... ఆమెకు ఆక్సిజన్ను అందించారు. అయినప్పటికీ.. ఆమె తన దృఢనిశ్చయంతో వైరస్ను తన ఒంట్లో నుంచి తరిమేశారు. మహమ్మారిపై విజేతగా నిలిచారు. యాదృచ్ఛికంగా ఆమె పుట్టినరోజు నాడే ఆమె ఆసుపత్రి నుంచి డిశ్ఛార్జి అయ్యారు.
1925లో శ్రీరామనవమి రోజున శాంతిబాయ్ జన్మించారు. ఈ ఏడాది అదే శ్రీరామనవమి రోజన శాంతి బాయ్ తన కొత్త జీవితాన్ని ప్రారంభించారు.
96 ఏళ్ల వయస్సులో రెండుసార్లు..
మహారాష్ట్ర బీద్‌ జిల్లాలోని అదాస్‌ ప్రాంతానికి చెందిన 90ఏళ్ల పాండురంగ ఆత్మారామ్‌ అగ్లావే గతేడాది నవంబరులో తొలిసారి కరోనా బారినపడ్డారు. 10 రోజులపాటు ఆసుపత్రిలో చికిత్స తీసుకున్న తర్వాత కోలుకుని ఇంటికి వెళ్లారు. అయితే ఏప్రిల్ తొలివారంలో పాండురంగకు మరోసారి కొవిడ్ సోకింది. వెంటనే ఆసుపత్రికి తరలించారు. ఐదు రోజుల తర్వాత ఆరోగ్యం మరింత క్షీణించగా.. స్వామి రామానంద్‌ తీర్థ్ మెడికల్‌ కాలేజీ ఆసుపత్రిలో చేర్చారు. చికిత్స అనంతరం వైరస్ నుంచి కోలుకుని ఏప్రిల్ 17న డిశ్చార్జ్‌ అయ్యారు.
తొలిసారి కంటే రెండోసారి కోలుకోవడం కాస్త కష్టంగానే అనిపించిందని పాండురంగ చెప్పారు. అయినప్పటికీ ధైర్యాన్ని వీడకపోవడం వల్ల క్షేమంగా బయటపడగలిగానని తెలిపారు.
76 ఏళ్ల వయస్సు.. ఆక్సిజన్ స్థాయి 77
ఛత్తీస్గఢ్లోని కాచందూర్కు చెందిన 76 ఏళ్ల యాస్మిన్ రెహమాన్ అనే వృద్ధురాలు కొవిడ్ను విజయవంతంగా ఎదుర్కొన్నారు. కరోనా సోకగా.. ఆమె చందూలాల్ చందార్కర్ కొవిడ్ కేర్ ఆసుపత్రిలో ఏప్రిల్ 2న చేరారు. ఆసుపత్రికి తరలించినప్పుడు ఆమె ఆక్సిజన్ స్థాయి 77 వద్ద మాత్రమే ఉంది. అత్యంత క్లిష్టపరిస్థితే అయినప్పటికీ.. ఆమె 17 రోజులపాటు వైరస్తో పోరాడి గెలిచారు. ఏప్రిల్ 19న ఆమె ఆసుపత్రి నుంచి డిశ్చార్జి అయ్యారు.
ఐదురోజుల్లోనే వైరస్పై విజయ కేతనం..
ఛత్తీస్గఢ్లోని బలూదా బజార్కు చెందిన 76 కస్తూరీ బాయ్ సాహు మనో ధైర్యం ముందు నిలబడలేక కొవిడ్ మహమ్మారి పలాయనం చిత్తగించింది. వైరస్తో తీవ్రంగా ప్రభావితమైన కస్తూరి... ఏప్రిల్ 17న ఆసుపత్రిలో చేరారు. ఐదు రోజుల అనంతరం వైరస్ను గెలిచి, డిశ్చార్జి అయ్యారు.
ఆసుపత్రిలో చేరినప్పుడు ఆమె ఆక్సిజన్ స్థాయి 85 కంటే తక్కువగానే ఉంది. ఫలితంగా ఆమె ఆహారాన్ని తీసుకోవడానికీ ఇబ్బంది పడేవారు. ఆమెకు చికిత్స అందించడం వైద్య సిబ్బందికి పెద్ద సవాలుగా మారింది. కానీ, ఆమె ఆరోగ్యం అనూహ్యంగా తిరిగి మెరుగైంది.
కొవిడ్ను జయించిన శతాధిక వృద్ధుడు
ప్రపంచమంతా కరోనా ధాటికి వణికిపోతున్న వేళ... మధ్యప్రదేశ్‌లో 104 ఏళ్ల వృద్ధుడు ఆ మహమ్మారిని జయించారు. బెతుల్‌కు చెందిన బిర్దీచంద్‌కి ఈ నెల 5న కరోనా పాజిటివ్ వచ్చింది. తాను ఏ మాత్రం భయపడలేదని, ఆసుపత్రికీ వెళ్లలేదని బిర్దీ చంద్‌ తెలిపారు. శాకాహారం తీసుకుంటూ, వ్యాయామాలు చేస్తూ సానుకూల దృక్పథంతో ఉన్నట్లు వెల్లడించారు. ఓ వైద్యుడు సూచించిన మందులను మాత్రం వాడినట్లు తెలిపారు.
ఇదీ చూడండి: కరోనాను జయించిన వ్యక్తికి రూ. 5 కోట్ల జాక్పాట్
ఇదీ చూడండి: ఆదర్శ దంపతులు: మరణంలోనూ ఒక్కటై..!
