Fake Bank Account: ఉత్తర్ప్రదేశ్లోని షాహ్జహాన్పుర్లో జరిగిన ఓ హృదయవిదారక ఘటన వెలుగులోకి వచ్చింది. ఏ తప్పూ చేయకపోయినా అధికారులు తనపై చర్యలు తీసుకుంటారేమో అన్న భయంతో ఆత్మహత్యకు పాల్పడ్డాడు ఓ వ్యక్తి. ఈ ఘటనపై పోలీసులు దర్యాప్తు చేపట్టారు.
ఇదీ జరిగింది..
ఖుతర్ పట్టణానికి చెందిన రామషీష్ (45) పేరు మీద యాక్సిస్ బ్యాంకులో అతనికి తెలియకుండా కొన్నేళ్ల క్రితం గుర్తుతెలియని వ్యక్తులు ఖాతా తెరిచారు. ఆహారధాన్యాల ముఠాకు చెందిన వీరు.. గోధుమ, వరి కొనుగోలు కేంద్రాలతో రూ.లక్షల్లో లావాదేవీలు జరిపారు. వారికి అందాల్సిన సొమ్ము వచ్చాక.. ఆ ఖాతా నుంచి లావాదేవీలు చేయడం ఆపేశారు. 2015లో ప్రారంభమైన ఈ ఖాతా 2019 వరకు వినియోగంలో ఉంది. ఆ తర్వాత అకౌంట్ నుంచి ఎలాంటి లావాదేవీలు జరగలేదు. ఇంత జరిగినా రామషీష్కు వీటి గురించి తెలియలేదు.
ఈ లావాదేవీలపై అనుమానం వ్యక్తం చేసిన బ్యాంకు అధికారులు రామషీష్ ఇంటికి వచ్చి ప్రశ్నించారు. తాను ఇప్పటివరకు ఎలాంటి ఖాతా తెరవలేదని మొరపెట్టుకున్నాడు. ఆ సమయంలో బ్యాంకు మేనేజర్ రామషీష్ ఫొటో తీసుకున్నాడని.. ఆధార్కార్డ్ చూపించమని డిమాండ్ చేశాడని రామషీష్ భార్య ప్రమీళా దేవీ ఆరోపించారు. మంగళవారం కూడా రామ్షీష్ను మార్కెట్లో ఓ బ్యాంక్ ఉద్యోగి ఈ విషయంపై బెదిరింపులకు పాల్పడ్డాడని ఆమె పేర్కొన్నారు. ఈ భయంతోనే బుధవారం అతను ఉరి వేసుకుని ఆత్మహత్య చేసుకున్నాడని కన్నీరు పెట్టుకుంది.
ఇదీ చూడండి : మెట్ల నుంచి 'పియానో' రాగాలు.. ఫిదా అవుతున్న ప్రయాణికులు
