Manipur CM swearing in ceremony: మణిపుర్ ముఖ్యమంత్రిగా ఎన్ బీరెన్ సింగ్ ప్రమాణ స్వీకారం చేశారు. ఆ రాష్ట్ర గవర్నర్ గణేషన్ను ఆయన చేత ప్రమాణం చేయించారు. ముఖ్యమంత్రితో పాటు ఐదుగురు ఎమ్మెల్యేలు మంత్రులుగా ప్రమాణం చేశారు. నెంచా కిప్జెన్, వై ఖేంచాంద్ సింగ్, బిస్వజిత్ సింగ్, అవాంగ్బౌ న్యూమాయ్, గోవిందాస్ కొంతౌజమ్ చేత గవర్నర్ ప్రమాణం చేయించారు. ఇంపాల్లో జరిగిన ఈ కార్యక్రమానికి భాజపా జాతీయ అధ్యక్షుడు జేపీ నడ్డా సహా పలువురు అగ్ర నేతలు హాజరయ్యారు.
" మా ప్రభుత్వ తొలి అడుగు రాష్ట్రాన్ని అవినీతి రహితంగా మార్చేందుకే. రాష్ట్రం నుంచి అవినీతిని తరిమికొట్టేందుకు నేను రాత్రింబవళ్లు పని చేస్తా. ఆ తర్వాత రాష్ట్రం నుంచి మత్తుపదార్థాలకు సంబంధించిన అంశాలపై చర్యలు ఉంటాయి."
- ఎన్ బీరెన్ సింగ్, మణిపుర్ ముఖ్యమంత్రి.
బీరెన్ సింగ్.. హెయ్గాంగ్ నియోజకవర్గం నుంచి గెలుపొందారు. ఆయన ప్రత్యర్థి, కాంగ్రెస్ పార్టీ అభ్యర్థి పంగిజం శరత్ చంద్ర సింగ్పై 17వేలకుపైగా ఓట్ల మెజారిటీతో విజయ దుందుభి మోగించారు. దీంతో వరుసగా ఐదోసారి ఎమ్మెల్యే అయ్యారు సింగ్. ఈ ఎన్నికల్లో భాజపా ఒంటరిగా పోటీ చేసి 32 చోట్ల గెలుపొందింది. దీంతో ప్రభుత్వ ఏర్పాటుకు కావాల్సిన మేజిక్ ఫిగర్ను చేరుకుంది.
బీరెన్ సింగ్ రాజకీయ ప్రస్థానం..
- రాజకీయాల్లోకి రాకముందు ఫుట్బాల్ ఆడటాన్ని ఎక్కువగా ఇష్టపడేవారు బీరెన్ సింగ్. స్పోర్ట్స్ కోటాలో సరిహద్దు భద్రతా దళం(బీఎస్ఎఫ్)లోనూ చేశారు. కానీ, కొద్ది రోజులకే ఆ ఉద్యోగాన్ని వదులుకుని జర్నలిజం వైపు అడుగులు వేశారు. 1992లో నహరోల్జి తౌడాంగ్ అనే వార్తా పత్రికను ప్రారంభించారు. 2001 వరకు దానికి ఎడిటర్గా పని చేశారు.
- ఒక ఫుట్బాల్ క్రీడాకారుడిగా, జర్నలిస్ట్గా తనకంటూ ఓ హోదా సంపాదించుకున్న బీరెన్ సింగ్ 2002లో క్రియాశీల రాజకీయాల్లోకి అడుగుపెట్టారు. తొలుత డెమొక్రటిక్ రెవల్యూషనరీ పీపుల్స్ పార్టీలో చేరారు. అయితే.. అదే ఏడాది కాంగ్రెస్లోకి వెళ్లారు. అప్పటి ముఖ్యమంత్రి ఓక్రమ్ ఇబోబి సింగ్ మంత్రివర్గంలో విజిలెన్స్ శాఖ మంత్రిగా బాధ్యతలు చేపట్టారు.
- 2002 నుంచి 2016 వరకు కాంగ్రెస్ హయాంలో నీటిపారుదల, ఆహార నియంత్రణ, యువజన వ్యవహారాలు, క్రీడల శాఖ వంటి కీలక పదవులు నిర్వర్తించారు బీరెన్ సింగ్. మాజీ సీఎం ఓక్రమ్ ఇబోబి సింగ్కు అత్యంత సన్నిహితుడిగానూ పేరు గడించారు.
- పార్టీతో తలెత్తిన విబేధాల కారణంగా కాంగ్రెస్కు రాజీనామా చేసి 2016లో భాజపాలో చేరారు బీరెన్ సింగ్. 2017లో కాషాయ పార్టీ టికెట్పై హెయ్గాంగ్ నియోజకవర్గంలో గెలుపొందారు. ఎన్పీపీ, ఎన్పీఎఫ్, ఎల్జేపీ, టీఎంసీ భాగస్వామ్యంతో భాజపాను అధికారంలోకి తీసుకొచ్చారు. భాజపా శాసనసభాపక్ష నేతగా ఎన్నికై 2017, మార్చి 15న మణిపుర్ ముఖ్యమంత్రిగా బాధ్యతలు చేపట్టారు.
- 2020లో పార్టీలో ఆయనపై వ్యతిరేకత మొదలైన క్రమంలో తన రాజకీయ చతురతతో వాటిని సద్దుమణిగేలా చేశారు. మరోమారు భాజపాను అధికారంలోకి తేవటంలో విజయం సాధించారు.
ఇదీ చూడండి: రాజ్యసభకు భజ్జీ.. లోక్సభకు 'షాట్ గన్' నామినేషన్
