అనుమానాస్పదంగా చైనా మహిళ.. నకిలీ పత్రాలు, రెండు దేశాల కరెన్సీ స్వాధీనం

హిమాచల్​ప్రదేశ్​లో ఓ చైనా మహిళను పోలీసులు అరెస్టు చేశారు. ఆమె నివాసాన్ని తనిఖీ చేసిన అధికారులకు కొన్ని నకిలీ పత్రాలతో పాటు నగదు దొరికిందని పోలీసులు తెలిపారు.

హిమాచల్​ప్రదేశ్​లోని మండి జిల్లాలో అనుమానాస్పదంగా ఉన్న ఓ చైనా మహిళను పోలీసులు అరెస్ట్​ చేశారు. ఆమె నివాసాన్ని తనిఖీ చేసిన అధికారులకు కొన్ని నకిలీ పత్రాలతో పాటు కొంత నగదు దొరికిందని పోలీసులు తెలిపారు. అయితే అక్టోబరు 22న ఆమెను అరెస్టు చేసినప్పటికి పోలీసులు ఈ విషయాన్ని ఇప్పటివరకు గోప్యంగా ఉంచారు.

జోగిందర్‌నగర్ సబ్ డివిజన్ పరిధిలోని చౌంతరాలోని ఒక మఠంలో గత 15 రోజులుగా ఒక మహిళ నివసిస్తోందని పోలీసులు తెలిపారు. తనను తాను నేపాల్ వాసి అని చెప్పుకుంటున్నప్పటికీ ఆమె అక్కడి వ్యక్తి కాదని అనుమానం వచ్చిందని చెప్పారు. మహిళను అరెస్టు చేసి ప్రశ్నించిన పోలీసులు ఆమె నివాసాన్ని తనిఖీ చేశారు. అందులో వారికి రెండు సెట్ల ధ్రువపత్రాలు లభ్యమయ్యాయి. ఈ పత్రాల్లో కొన్ని చైనాకు చెందినవి, మరికొన్ని నేపాల్‌కు చెందినవి ఉన్నట్లు పోలీసులు గుర్తించారు.

అయితే, రెండు దేశాల పత్రాల్లో ఆమె వయసు వేర్వేరుగా ఉందని, కొన్ని వివరాలు సైతం సరిపోలడం లేదని పోలీసులు తెలిపారు. దీంతో ఆమెపై అనుమానం మరింత పెరిగిందని చెప్పారు. రెండిట్లో ఆమె వయసుతో పాటు కొన్ని వివారాలు వేరుగా ఉండటంతో పోలీసుల అనుమానం మరింత పెరిగింది. పత్రాలతో పాటు రూ.6.40 లక్షల భారత కరెన్సీ, రూ.లక్షా 10 వేల నేపాల్​ కరెన్సీని కూడా స్వాధీనం చేసుకున్నారు.

ఈ విషయాలన్నింటిని దృష్టిలో ఉంచుకుని పోలీసులు ఆ మహిళను అదుపులోకి తీసుకున్నారు. మహిళ వద్ద రెండు మొబైల్ ఫోన్లు లభ్యమవ్వగా వాటిని తదుపరి విచారణ కోసం పరీక్షలకు పంపారని తెలిపారు. అక్టోబర్ 23న మహిళను జోగిందర్‌నగర్ కోర్టులో హాజరుపరచగా.. అక్కడి నుంచి ఆమెను అక్టోబర్ 27 వరకు పోలీసు రిమాండ్‌కు పంపారు. తాను బౌద్ధమత విద్యను అభ్యసించేందుకే ఇక్కడికి వచ్చానని మహిళ చెబుతోంది. అయితే, అసలు మహిళ ఇక్కడ ఉండటానికి ఇంకేమైనా కారణాలు ఉన్నాయా? అనే కోణంలో పోలీసులు దర్యాప్తు చేపట్టారు. దీనిపై కేంద్ర ప్రభుత్వానికి కూడా పూర్తి సమాచారం అందించామని, ఆ తర్వాత కేంద్రం నుంచి వచ్చే బృందం ఎదుట విచారణ జరుపుతామని తెలిపారు.

ఇదీ చదవండి: ల్యాప్‌టాప్‌ బుక్‌ చేస్తే రాయి వచ్చింది.. పార్సిల్‌ ఓపెన్​ చేసి ఖంగుతిన్న వినియోగదారుడు