Maharashtra Political Crisis : పార్టీలో సంక్షోభం ఏర్పడిన నేపథ్యంలో ఎన్సీపీ అధినేత శరద్ పవార్ తన వ్యూహాలకు పదును పెట్టారు. ఎన్సీపీలో చీలిక తెచ్చిన అజిత్ పవార్ వైపు ఆకర్షితులు కాకుండా శాసనసభ్యులను శరద్ పవార్ తనవైపు తిప్పుకుంటున్నారు. ఆదివారం అజిత్ పవార్ ప్రమాణ స్వీకారానికి హాజరైన ఇద్దరు ఎమ్మెల్యేలు తిరిగి శరద్ పవార్ చెంతకు చేరారు. సోమవారం ఆయన కారులో వీరిద్దరు ప్రత్యక్షమయ్యారు. మకరంద్ పాటిల్, బాలాసాహెబ్ పాటిల్ అనే ఇద్దరు ఎమ్మెల్యేలు తిరిగి శరద్ పవార్ గూటికి వచ్చారు. షిరూర్ ఎంపీ అమోల్ కోల్హే సైతం తాను శరద్ పవార్ వెంటే ఉంటానని ప్రకటించారు. మకరంద్ పాటిల్.. సతారా జిల్లాలోని వాయీ నియోజకవర్గం నుంచి ప్రాతినిధ్యం వహిస్తుండగా.. బాలాసాహెబ్ పాటిల్ నార్త్ కరాడ్ ఎమ్మెల్యేగా ఉన్నారు.
సోమవారం గురు పూర్ణిమ సందర్భంగా తన గురువు, మహారాష్ట్ర మొదటి ముఖ్యమంత్రి యశ్వంతరావు చవాన్ స్మారక చిహ్నానికి నివాళులు అర్పించేందుకు శరద్ పవార్ వెళ్లగా.. ఆయనతో పాటు ఈ ఇద్దరు ఎమ్మెల్యేలు కూడా పయనమయ్యారు. వీరిని తిరిగి తీసుకురావడంలో శరద్ పవార్ రాత్రికే రాత్రే వ్యూహాలు రచించినట్లు తెలుస్తోంది. ప్రస్తుతం మహారాష్ట్ర రాజకీయ వర్గాల్లో ఇది చర్చనీయాంశంగా మారింది.
వాయీ నియోజకవర్గం ఎన్సీపీకి మంచి పట్టున్న స్థానం. ఈ స్థానం నుంచి ఎన్సీపీ అభ్యర్థులు చాలా సార్లు ఎన్నికయ్యారు. మకరంద్ పాటిల్ తాత దివంగత లక్ష్మణ్ పాటిల్, శరద్ పవార్లు మంచి మిత్రులుగా ఉండేవారు. లక్ష్మణ్రావు పాటిల్ సతారా జిల్లా ఎన్సీపీ అధ్యక్షుడిగానూ పనిచేశారు. ఆయన ఎంపీగానూ.. వాయీ నియోజకవర్గం నుంచి మూడు సార్లు ఎమ్మెల్యేగానూ ఎన్నికయ్యారు.
అజిత్ పవార్ కొత్త పార్టీ కార్యాలయం..
Ajit Pawar NCP : మరోవైపు, మహారాష్ట్రలో ఎన్సీపీ కొత్త పార్టీ కార్యాలయాన్ని ప్రారంభించేందుకు అజిత్ పవార్ సన్నాహాలు చేస్తున్నారు. ముంబయిలోని మంత్రాలయ ప్రాంత సమీపంలో పార్టీ ఆఫీస్ను ఏర్పాటు చేయనున్నట్లు సంబంధిత వర్గాలు వెల్లడించాయి.
అజిత్ పవార్ కొత్త పార్టీ ఆఫీస్ ప్రారంభించే నిర్ణయంపై ఎన్సీపీ శరద్ పవార్ వర్గం నేత క్లైడ్ క్రాస్టో తీవ్రంగా మండిపడ్డారు. రాజ్యాంగంలోని పదో షెడ్యూల్, పార్టీ ఫిరాయింపుల నిరోధక చట్టం, ఎన్సీపీ పార్టీ నియమావళి ప్రకారం.. ఇలాంటివి చేయడం నిబంధనలకు విరుద్ధమని అన్నారు. ప్రఫుల్ పటేల్, అజిత్ పవార్ పరిపక్వత కలిగిన నాయకులన్న క్లైడ్ క్రాస్టో.. నియమ నిబంధనలు తెలిసి కూడా ఇలాంటి పనులు చేస్తే ఏం మాట్లాడగలమని ఆవేదన వ్యక్తం చేశారు.
స్పీకర్ కీలక వ్యాఖ్యలు
Maharashtra Speaker Rahul Narwekar : ఎన్సీపీ ఇంకా ప్రతిపక్షంలోనే ఉందా లేదంటే బీజేపీ-శివసేన ప్రభుత్వంలో భాగస్వామిగా ఉందా అనే విషయాన్ని తానింకా నిర్ధరించుకోలేదన్నారు మహారాష్ట్ర స్పీకర్ రాహుర్ నర్వేకర్. ఆదివారం మీడియాతో మాట్లాడిన ఆయన.. పార్టీ చీలికపై తనకింకా ఎటువంటి పిటిషన్ అందలేదన్నారు. మంత్రులుగా ప్రమాణ స్వీకారం చేసిన ఎనిమిది మంది ఎమ్మెల్యేలపై అనర్హత వేయాలన్న పిటిషన్ మాత్రమే అందిందన్నారు. ఈ మొత్తం అంశంపై స్పష్టత వచ్చిన తరువాత ముందుకెళతానని నర్వేకర్ వెల్లడించారు.
