29 ఏళ్ల క్రితం నాటి ఓ హత్య కేసులో నిందితుడ్ని మహారాష్ట్ర వార్ధా పోలీసులు పట్టుకున్నారు. సెలవు ఇవ్వలేదన్న కారణంతో.. సహోద్యోగిపై కాల్పులు జరిపి, హత్య చేసిన కేసులో సీఆర్పీఎఫ్ మాజీ ఉద్యోగిని అరెస్టు చేశారు.
అసలేం జరిగింది?
మహారాష్ట్ర ఆర్వీ ప్రాంతానికి చెందిన.. సుభాష్ రామకృష్ణ నఖ్లే అనే వ్యక్తి.. త్రిపుర కాంచంపుర్లోని సీఆర్పీఎఫ్ 45వ బెటాలియన్లో విధులు నిర్వర్తించేవాడు. 1992 జూన్ 3న అతడు తన కుటుంబ సభ్యుల్లో ఒకరు మరణించినందున.. సెలవు కావాలని తన పైఅధికారులకు విజ్ఞప్తి చేశాడు. అయితే.. వారు అతనికి సెలవు మంజూరు చేయలేదు. దాంతో ఆగ్రహానికి గురైన సుభాష్ నఖ్లే.. తన వద్ద ఉన్న తుపాకీతో కాల్పులు జరిపాడు.
ఈ ఘటనలో ఓ సీఆర్పీఎఫ్ సిబ్బంది ప్రాణాలు కోల్పోగా.. మరికొంత మంది గాయపడ్డారు. కాల్పుల అనంతరం సుభాష్ నఖ్లే.. అక్కడి నుంచి పరారయ్యాడు. 20 ఏళ్లుగా ఈ కేసులో పోలీసులు ఎలాంటి పురోగతి సాధించలేకపోయారు. అయితే.. 2012లో నఖ్లే తన సొంతూరికి రాగా.. పోలీసులు అతని గురించి వివరాలు తెలుసుకోగలిగారు. ఓ ఆస్తి వివాదంలో నఖ్లే ఇటీవల మరోసారి తమ గ్రామానికి రావడం వల్ల పోలీసులు అతన్ని పట్టుకుని, కస్టడీకి తరలించారు.
ఇదీ చూడండి: 'రేప్ చేసిన వ్యక్తితోనే పెళ్లి'కి సుప్రీం నో!
ఇదీ చూడండి: వ్యాపారంలో చిన్నోళ్లు- భాషా జ్ఞానంలో ఘనులు!
