ఇటీవలి కాలంలో సైబర్ దాడులు పెరిగిపోయాయి. రోజు రోజుకు వాటి నుంచి ముప్పు అధికమవుతోంది. ఈ క్రమంలో సైబర్ దాడులను అరికట్టేందుకు భారత్లో దీర్ఘకాలంగా పెండింగ్లో ఉన్న 'జాతీయ సైబర్ భద్రతా వ్యూహం'(ఎన్సీఎస్ఎస్)ను కొద్ది రోజుల్లోనే అమలులోకి తీసుకొచ్చే అవకాశాలు కనిపిస్తున్నాయి. ఇటీవల భారత్లోని విద్యుత్తు రంగ సంస్థలపై చైనా ఆధారిత సంస్థలు సైబర్ దాడులు చేశాయన్న వార్తల నేపథ్యంలో.. భారత సైబర్ భద్రతా విధానాన్ని సత్వరమే అమలు చేయాల్సిన ఆవశ్యకత ఏర్పడింది.
ఈ విషయంపై ఈటీవీ భారత్తో మాట్లాడారు భారత జాతీయ సైబర్ భద్రతా కోఆర్డినేటర్, లెఫ్టినెంట్ జనరల్ రాజేశ్ పంత్.
" మన కొత్త వ్యూహం ఎన్సీఎస్ఎస్ త్వరలోనే అమలులోకి రానుంది. పూర్తి వ్యవస్థను ఏ విధంగా రక్షించుకోవచ్చు అనేది ఇందులో పొందుపరిచాం. కొత్త వ్యూహంపై అన్ని పనులు పూర్తయ్యాయి. కేంద్ర మంత్రివర్గ ఆమోదం కోసం పంపించాం. నెల లేదా రెండు నెలల్లో అమలులోకి వస్తుంది.
అంతర్జాల ఆధారిత కంప్యూటర్ల విషయంలో జాగ్రత్తగా ఉండాలి. పలు లింకులపై క్లిక్ చేసేలా సైబర్ నేరగాళ్లు ఉచ్చు పన్నుతారు. వాటిని క్లిక్ చేస్తే మాల్వేర్ కంప్యూటర్లోకి చేరుతుంది. అక్కడి నుంచి ఇతర కంప్యూటర్లలోకి వెళుతుంది. అడ్మిన్ వివరాలను సేకరించేందుకు ప్రయత్నిస్తుంది. కానీ, ఆపరేటింగ్ సిస్టమ్స్ను హ్యాక్ చేయలేదు. ఐటీపై అధికంగా ఆధారపడుతున్నందున భారత్లోని ప్రతి రంగం సైబర్ సెక్యూరిటీ కేంద్రాన్ని కలిగి ఉండాలి."
- లెఫ్టినెంట్ జనరల్ రాజేశ్ పంత్, జాతీయ సైబర్ భద్రతా కోఆర్డినేటర్
భారత్-చైనా మధ్య సరిహద్దు ప్రతిష్టంభన నెలకొన్న వేళ భారత్లోని సంస్థలపై చైనాకు చెందిన సంస్థలు సైబర్ దాడులకు పాల్పడుతున్నట్లు వచ్చిన నివేదికలు.. అప్రమత్తమవ్వాల్సిన ఆవశ్యకతను పెంచాయి. అయితే.. పలు దఫాల చర్చల ఫలితంగా ప్రస్తుతం బలగాల ఉపసంహరణ కొనసాగుతున్న క్రమంలో కాస్త ఊరట లభించినట్లయింది.
గత ఏడాది హార్వర్డ్ కెన్నెడీ స్కూల్ విడుదల చేసిన ప్రపంచ సైబర్ పవర్ నివేదికలో భారత్ 21వ స్థానానికి పరిమితమైంది. మరోవైపు.. అమెరికా నేతృత్వంలోని జాతీయ సైబర్ పవర్ సూచీ(ఎన్సీపీఐ)లో చైనా.. సైబర్ భద్రతలో రెండో బలమైన దేశంగా నిలిచింది. ఆ తర్వాత బ్రిటన్, రష్యా, నెదర్లాండ్స్, ఫ్రాన్స్, జర్మనీ, కెనడా, జపాన్, ఆస్ట్రేలియా ఉన్నాయి. 30 దేశాల్లోని సైబర్ భద్రతా సామర్థ్యంపై అధ్యయనం చేసి నివేదిక రూపొందించారు. ఇందులో ప్రధానంగా దేశీయ సంస్థలపై నిఘా, పర్యవేక్షణ, జాతీయ సైబర్ భద్రతా, వాటి సామర్థ్యం పెంపు, జాతీయ భద్రత కోసం విదేశీ ఇంటెలిజెన్స్ డేటా సేకరణ వంటి కీలక అంశాలను పరిగణనలోకి తీసుకున్నారు.
ఇదీ చూడండి: సైబర్ దాడుల బాధితుల్లో భారత్కు రెండోస్థానం
