పార్టీ ఫిరాయింపులతో సతమతమవుతున్న ఎల్జేపీ నాయకుడు చిరాగ్ పాసవాన్కు మరో ఎదురుదెబ్బ తగిలింది. గత అసెంబ్లీ ఎన్నికల్లో గెలిచిన ఒక్కగానొక్క ఎమ్మెల్యే రాజ్కుమార్ సింగ్ జేడీయూలో చేరారు. ముఖ్యమంత్రి నితీష్ కుమార్ సమక్షంలో ఆ పార్టీ కండువ కప్పుకున్నారు. ఈ మేరకు అసెంబ్లీలో ఎల్జేపీ పార్టీని జేడీయూలో కలిపేయడానికి బిహార్ స్పీకర్ మంగళవారం అనుమితినిచ్చారు. దీంతో అసెంబ్లీలో ఎల్జేపీ గళం వినిపించే అవకాశమే లేకుండా పోయింది.
డిప్యూటీ స్పీకర్ ఎన్నిక కోసం ఎన్డీఏ కూటమికి మద్దతుగా రాజ్ కుమార్ ఓటేయగా.. ఎల్జేపీ జనరల్ సక్రటరీ గత నెలలోనే షో కాజ్ నోటీసులు జారీ చేశారు. భాజపా నాయకుడు భూపేంద్ర యాదవ్ను గత ఫిబ్రవరిలో కలిసినప్పుడే రాజ్ కుమార్.. జేడీయూలో చేరుతున్నారనే ఊహాగానాలు వెలువడ్డాయి. ప్రస్తుతం అవి నిజమయ్యాయి.
ఎల్జేపీకి ఉన్న ఒక్కగానొక్క ఎమ్మెల్సీ నుతన్ సింగ్(భాజపా నాయకుడు నీరజ్ కుమార్ భార్య) గత ఫిబ్రవరిలోనే కాషాయ కండువా కప్పుకున్నారు.
ఎన్డీఏతో సీట్ల సర్దుబాటులో పొత్తు కుదురకపోవటంతో గత ఎన్నికల్లో ఎల్జేపీ ఒంటరిగానే పోటీ చేసింది. 143 స్థానాల్లో బరిలో దిగగా.. మిటిహని నియోజకవర్గం నుంచి మాత్రమే స్వల్ప ఆధిక్యం(333ఓట్లు)తో రాజ్ కుమార్ సింగ్ విజయం సాధించారు. అవినీతి ఆరోపణలతో నితీష్ ప్రభుత్వాన్ని ఇరుకున పెడుతున్న చిరాగ్కు.. సొంత పార్టీ నేతలు జేడీయూలో చేరడం ఇబ్బందికరంగా మారిందని సమాచారం.
ఇదీ చదవండి: 'షా ఆదేశాలతోనే.. ఓటర్లపై జవాన్ల వేధింపులు'
