ఆమ్ ఆద్మీ పార్టీ, కాంగ్రెస్ అభ్యంతరాల మధ్య వివాదాస్పద 'గవర్నమెంట్ ఆఫ్ నేషనల్ క్యాపిటల్ టెర్రిటరీ ఆఫ్ దిల్లీ(జీఎన్సీటీడీ)-సవరణ బిల్లు'కు లోక్సభ ఆమోదం తెలిపింది. దిల్లీలో ప్రభుత్వం అంటే లెఫ్టినెంట్ గవర్నరే అని ఈ బిల్లులో పేర్కొన్నారు.
జీఎన్సీటీడీ బిల్లును లోక్సభలో కేంద్ర హోం శాఖ సహాయ మంత్రి జి.కిషన్ రెడ్డి ప్రవేశపెట్టారు. దిల్లీ ప్రభుత్వ విధుల్లో.. వివిధ అంశాల్లో సందిగ్ధత, కోర్టులో పలు కేసులు పెండింగ్లో ఉన్న నేపథ్యంలో ఈ బిల్లును తీసుకురావడం అనివార్యమైందని పేర్కొన్నారు. దీనిని రాజకీయ బిల్లుగా పిలవవద్దని విపక్షాలను ఆయన కోరారు.
ఏంటి ఈ 'దిల్లీ' బిల్లు..?
ఈ బిల్లు ప్రకారం దిల్లీ ప్రభుత్వం అంటే లెఫ్టినెంట్ గవర్నర్ ప్రభుత్వం అని అర్థం వస్తుంది. దిల్లీ ప్రభుత్వం ఏదైనా చర్యలకు ఉపక్రమించినప్పుడు లెఫ్టినెంట్ గవర్నర్ అభిప్రాయాన్ని తప్పనిసరిగా తీసుకోవాల్సి ఉంటుంది.
వ్యతిరేకించిన కాంగ్రెస్, ఆప్
ఈ బిల్లును దిల్లీలోని అధికార ఆమ్ ఆద్మీ పార్టీ(ఆప్) తీవ్రంగా వ్యతిరేకించింది. రాష్ట్రాల హక్కులను కాలరాయడంలో కేంద్ర ప్రభుత్వానికి చాలా అనుభవం ఉందని ఆప్ సభ్యుడు భగవాన్ మన్ అన్నారు. ఈ బిల్లుపై జరిగిన చర్చలో పాల్గొన్న కాంగ్రెస్ ఎంపీ మనీష్ తివారీ.. దీనిని రాజ్యాంగ విరుద్ధ చర్యగా పేర్కొన్నారు. దిల్లీ ప్రభుత్వ హక్కులను లాక్కునేందుకు ఈ బిల్లును తీసుకువచ్చారని ఆరోపించారు.
అయితే.. 1996 నుంచి కేంద్రం, దిల్లీ ప్రభుత్వం వద్ద ఉన్న విభేదాలు ఈ బిల్లు ద్వారా అంతమవుతాయని కేంద్ర మంత్రి కిషన్ రెడ్డి అన్నారు.
"జీఎన్సీటీడీ చట్టాన్ని 1991లో కాంగ్రెస్ ప్రభుత్వమే తీసుకువచ్చింది. దాంతో తక్కువ శాసన అధికారాలు ఇస్తూ.. దిల్లీని కేంద్ర పాలిత ప్రాంతంగా మార్చారు. మేము దిల్లీ ప్రభుత్వం నుంచి ఎలాంటి అధికారాలను లాక్కోవడమో, ఇవ్వడమో చేయటం లేదు. ఈ బిల్లు ద్వారా 1996 నుంచి కేంద్రం, దిల్లీ ప్రభుత్వం మధ్య ఉన్న విభేదాలు సమసిపోతాయి."
- జి. కిషన్ రెడ్డి, హోంశాఖ సహాయ మంత్రి
"దేశ రాజధాని ప్రజలను కేంద్రం అవమానపర్చడానికి ఈ బిల్లును తీసుకువచ్చింది. ఈ బిల్లు ద్వారా దిల్లీ ప్రజలు ఓట్లు వేసి గెలిపించిన వారి దగ్గరి నుంచి అధికారాన్ని ఓడిపోయిన వారు లాక్కంటున్నారు." అని దిల్లీ ముఖ్యమంత్రి అరవింద్ కేజ్రీవాల్.. ట్విట్టర్ వేదికగా ఆగ్రహం వ్యక్తం చేశారు.
