ప్రజలు తమంతట తాముగా కొవిడ్ నిబంధనలు పాటిస్తారని నమ్ముతున్నానని మహారాష్ట్ర ముఖ్యమంత్రి ఉద్ధవ్ ఠాక్రే అన్నారు. లేదంటే.. భవిష్యత్లో లాక్డౌన్ విధిస్తామని హెచ్చరించారు. ఆ రాష్ట్రంలో కరోనా రోజువారి కేసుల్లో గణనీయమైన పెరుగుదల కనిపిస్తున్న నేపథ్యంలో.. శుక్రవారం ఆయన మీడియాతో మాట్లాడారు. కరోనా కట్టడికి నూతన ఆంక్షలు విధిస్తున్నట్లు తెలిపారు.
"లాక్డౌన్ అనే ఆప్షన్ మనకు ఉంది. కానీ, కొవిడ్ నిబంధనలను ప్రజలు పాటిస్తారని నమ్ముతున్నాను. గతేడాది మహమ్మారి ప్రారంభమైనప్పటికీ.. వైరస్ను ఎదుర్కోవడానికి మన దగ్గర ఏమీ లేదు. కానీ ఇప్పుడు మనకు టీకాలు ఉన్నాయి. అందరూ టీకా వేసుకుంటేనే కరోనాను తరిమిగొట్టగలం."
-ఉద్ధవ్ ఠాక్రే, మహారాష్ట్ర ముఖ్యమంత్రి.
వ్యాక్సిన్ సరఫరాలో ఎలాంటి కొరత లేదని కేంద్రం భరోసా ఇచ్చిందని ఠాక్రే అన్నారు. ప్రజలు ఎలాంటి భయం లేకుండా టీకా వేయించుకోవాలని కోరారు.
మహారాష్ట్రలో కరోనా 2.0 తీవ్ర స్థాయిలో విజృంభిస్తోంది. గురువారం 25వేల 833మందికి వైరస్ సోకినట్టు తేలగా.. మహమ్మారి విజృంభించిన నాటి నుంచి.. ఆ రాష్ట్రంలో ఇప్పటివరకు నమోదైన కేసుల్లో ఇవే అత్యధికం కావడం గమనార్హం.
ఇదీ చూడండి:కొవిడ్ విజృంభణ-కొత్తగా 40వేల కేసులు
