'కరోనాపై నిమ్మకు నీరెత్తినట్లుగా కేంద్రం'

కరోనా కట్టడికి సమాయత్తం అవ్వటంలో కేంద్రం సమయాన్ని వృథా చేస్తోందని వామపక్షాలు మండిపడ్డాయి. వైరస్​ వ్యాప్తిని అదుపు చేయటంలో కేంద్ర ప్రభుత్వం విఫలమైతే.. అధికారంలో కొనసాగే నైతికత కోల్పోతుందని స్పష్టం చేశాయి. అందరికీ ఉచిత టీకా ఇవ్వాలని డిమాండ్ చేశాయి.

కొవిడ్ మహమ్మారిని కట్టడి చేయటంలో కేంద్రం అనుసరిస్తున్న విధానాలపై వామపక్షాలు ఆందోళన వ్యక్తం చేశాయి. వైరస్ వ్యాప్తిని అడ్డుకోవటంలో కేంద్రం నిమ్మకు నీరెత్తినట్లు వ్యవహరిస్తోందని, సమయాన్ని వృథా చేస్తోందని మండిపడ్డాయి. ఈ మేరకు సీపీఎం, సీపీఐ, సీపీఐఎంఎల్, ఆల్​ ఇండియా ఫార్వార్డ్ బ్లాక్​, రెవెల్యూషనరీ సోషలిస్ట్ పార్టీలు.. సంయుక్తంగా ప్రకటన చేశాయి.

" స్వాతంత్ర్యం వచ్చినప్పటినుంచి ఎన్నడూ లేని అతిపెద్ద ఆరోగ్య సంక్షోభాన్ని భారత్​ ఎదుర్కుంటోంది. కరోనా కట్టడికి కేంద్రం యుద్ధప్రాతిపదికన చర్యలు తీసుకుని.. ప్రజల ప్రాణాలు కాపాడాలి. ప్రజలకు ఉచితంగా టీకాలు అందించాలి. మన సలహాలు, సూచనలను పట్టించుకోకుండా ఏడాది కాలాన్ని కేంద్రం వృథా చేసింది. వైరస్​ను అదుపు చేయటంలో విఫలమైతే.. ఎన్​డీఏ అధికారంలో కొనసాగే నైతిక హక్కు కోల్పోతుంది."

-- వామపక్షాల సంయుక్త ప్రకటన

'ఆ నిధులు ఖర్చు చేయండి'

అన్ని ఆసుపత్రుల్లో ఆక్సిజన్, ఇతర ఔషధాలు ఉండేలా కేంద్రం చర్యలు తీసుకోవాలని డిమాండ్ చేశాయి లెఫ్ట్​ పార్టీలు. బడ్జెట్​లో వైద్య రంగానికి కేటాయించిన రూ. 35వేల కోట్లు వెంటనే ఖర్చు చేయాలన్నాయి. పీఎం కేర్స్ నిధులు, సెంట్రల్​ విస్టా ప్రాజెక్టు కోసం కేటాయించిన రూ. 20 వేల కోట్లను వ్యాక్సిన్​ కొనుగోలు కోసం ఖర్చు పెట్టాలని వామపక్షాలు సూచించాయి.

ఇదీ చదవండి : 'ప్రాణాలు పోతుంటే చూస్తూ ఎలా ఊరుకుంటాం?'