హజ్-2021 యాత్రకు సంబంధించిన ధరఖాస్తు గడువును ప్రభుత్వం పొడిగించింది. వచ్చే ఏడాది జనవరి 10 వరకు ఈ ప్రక్రియ కొనసాగనుందని కేంద్ర మైనారిటీ వ్యవహారాల శాఖ మంత్రి ముక్తార్ అబ్బాస్ నఖ్వీ తెలిపారు. భక్తులు వచ్చే ప్రదేశాలను(ఎంబార్కేషన్ పాయింట్లు) బట్టి ఖరీదు కూడా తగ్గించినట్లు చెప్పారు.
'హజ్ యాత్రకు వెళ్లేందుకు దరఖాస్తు సమర్పించడానికి ఈరోజు, డిసెంబర్ 10 ఆఖరి రోజు. కానీ, ఆ గడువును 2021, జనవరి 10 వరకు పొడిగించామ'ని హజ్ కమిటీతో భేటీ అనంతరం నఖ్వీ తెలిపారు. వచ్చే ఏడాది జూన్-జులై మధ్య ఈ హజ్ 2021 యాత్ర జరగనుంది. సౌదీ అరేబియా, భారత ప్రభుత్వం నిర్దేశించిన కొవిడ్ మార్గదర్శకాలనుసారం ఈ యాత్ర కొనసాగనుంది.
సౌదీ అరేబియాతో చర్చలు జరిపిన అనంతరం.. ఎంబార్కేషన్ పాయింట్ల ఛార్జీలు తగ్గిస్తూ నిర్ణయం తీసుకున్నామని నఖ్వీ తెలిపారు. మహమ్మారి దృష్ట్యా కొవిడ్ నిబంధనలు తప్పనిసరిగా పాటించాల్సిందేనని స్పష్టం చేశారు.
"వయో పరిమితులు విధించే అవకాశం ఉంది. ప్రతి యాత్రికుడు 72 గంటల ముందే కచ్చితంగా కొవిడ్ పరీక్ష చేయించుకోవాలి. పరీక్షల్లో నెగెటివ్ వచ్చిన వారికే యాత్రకు అనుమతి ఉంటుంది."
-- ముక్తార్ అబ్బాస్ నఖ్వీ, మైనారిటీ వ్యవహారాల శాఖ మంత్రి.
హజ్ 2021 యాత్ర కోసం ఈసారి 40,000కు పైగా దరఖాస్తులు వచ్చాయి. వారిలో 500కు పైగా దరఖాస్తులు ఒంటరి మహిళలవే. 2020 సంవత్సరంలో ఈ కేటగిరీలో 2,100 మంది స్త్రీలు దరఖాస్తు చేసుకున్నారు.
హజ్ యాత్ర చేయాలనుకునే ఒంటరి మహిళల వద్ద నుంచి దరఖాస్తులను ఆహ్వానిస్తున్నామని మైనారిటీ మంత్రిత్వ శాఖ తెలిపింది. 2021 హజ్ యాత్ర కోసం ఎంబార్కేషన్ పాయింట్ల సంఖ్యను 10కి కుదించినట్లు చెప్పింది. అహ్మదాబాద్, బెంగళూరు, కొచిన్, దిల్లీ, గువాహటి, హైదరాబాద్, కోల్కతా, లఖ్నవూ, ముంబయి, శ్రీనగర్లలో ఈ పాయింట్లు ఉంటాయని వెల్లడించింది.
ఎంబార్కేషన్ పాయింట్ల వారీగా ధరల అంచనాలు
- అహ్మదాబాద్, ముంబయి- రూ.3,30,000
- బెంగళూరు, లఖ్నవూ, దిల్లీ, హైదరాబాద్- రూ.3,50,000
- కొచిన్, శ్రీనగర్- రూ.3,60,000
- కోల్కతా- రూ.3,70,000, గువాహటి- రూ.4,00,000
ఇదీ చూడండి:'కరోనా భయాలతోనే హజ్కు తగ్గిన దరఖాస్తులు'
