2017 ఉత్తర్ప్రదేశ్ ఆసుపత్రిలో చిన్నారుల మరణానికి సంబంధించి కఫీల్ ఖాన్ అనే పిల్లల వైద్యుడిని ప్రభుత్వం.. తాజాగా విధుల నుంచి తొలగించింది. ఘటన జరిగిన సమయం నుంచి ఆయన సస్పెన్షన్లోనే ఉన్నారు.
ఇదీ జరిగింది..
2017 ఆగస్టు 22న గోరఖ్పుర్ బీఆర్డీ వైద్య కళాశాలలోని ఆక్సిజన్ కొరత కారణంగా 70మంది చిన్నారులు మరణించారు. వార్డు ఇన్ఛార్జ్ అయ్యుండి.. ఆక్సిజన్ కొరతపై అధికారులకు సమాచారం ఇవ్వలేదని, అందుకే చిన్నారులు మరణించారని కఫీల్ ఖాన్పై ఆరోపణలు వచ్చాయి. దీంతో ఆయన్ను ప్రభుత్వం వెంటనే సస్పెండ్ చేసింది.
కఫీల్పై వచ్చిన నాలుగు ఆరోపణల్లో మూడు నిజమని తేలినట్టు వైద్యశాఖ అదనపు ముఖ్య కార్యదర్శి అలోఖ్ కుమార్ వెల్లడించారు. కఫీల్ను విధుల నుంచి తొలగించాలని యూపీపీఎస్సీ(ఉత్తర్ప్రదేశ్ పబ్లిక్ సర్వీస్ కమిషన్) తేల్చి చెప్పిందని వివరించారు. అందువల్ల కఫీల్ను విధుల నుంచి తీసేశామని స్పష్టం చేశారు. ఇందుకు సంబంధించిన పత్రాలను కోర్టుకు అందిస్తామన్నారు.
తనను విధుల నుంచి తొలగించడంపై షాక్ అయినట్టు కఫీల్ తెలిపారు.
"ఆక్సిజన్ సప్లయర్లకు ప్రభుత్వం డబ్బులు చెల్లించకపోవడం వల్లే ఆ చిన్నారులు మరణించారు. ఈ ఘటనలో 8మంది వైద్యులను సస్పెండ్ చేశారు. తిరిగి ఏడుగురిని విధుల్లోకి చేర్చుకున్నారు. ఎన్నోసార్లు దర్యాప్తు జరగ్గా, నాకు వ్యతిరేకంగా ఏమీ లేకపోవడం వల్ల కోర్టు నాకు క్లీన్చిట్ ఇచ్చింది. దర్యాప్తును నిలిపివేయాలని 2019లోనే ఆదేశాలిచ్చింది. ఇందుకు కోర్టు సమక్షంలోనే ప్రభుత్వం అంగీకరించింది. కానీ ఇప్పుడు నన్ను తొలగించినట్టు చెబుతున్నారు. ఇది ఆశ్చర్యకరంగా ఉంది. నాకు ఇంకా ఎలాంటి నోటీసులు అందలేదు. కోర్టుకు కూడా ఇంకా ఎలాంటి పత్రాలు ఇవ్వలేదు."
--- కఫీల్ ఖాన్, వైద్యుడు.
ప్రభుత్వంపై తనకు నమ్మకం పోయిందని, త్వరలోనే ఈ విషయంపై కోర్టును ఆశ్రయిస్తానని కఫీల్ ఖాన్ వెల్లడించారు. తాను ఎలాంటి తప్పు చేయలేదని, నిర్దోషిగా బయటకొస్తానని ఆశాభావం వ్యక్తం చేశారు.
ఈ ఘటనపై కాంగ్రెస్ ప్రధాన కార్యదర్శి ప్రియాంక గాంధీ స్పందించారు. విద్వేషపూరితమైన అజెండాతో, కఫీల్ ఖాన్ను హింసించేందుకే ప్రభుత్వం ఇలాంటి చర్యలు చేపడుతోందని ట్వీట్ చేశారు.
ఇదీ చూడండి:-
