నైరుతి బంగాళాకాతంలో ఏర్పడిన అల్పపీడనం తీవ్ర తుపానుగా మారి కేరళ, తమిళనాడువైపుగా దుసుకొస్తోంది. డిసెంబర్ 4న తీరం దాటనుంది తుపాను. దీంతో డిసెంబర్ 3 నుంచి 5 తేదీల మధ్య కేరళలోని ఏడు దక్షిణ జిల్లాలో పెనుగాలులతో కూడిన భారీ వర్షాలు కురుస్తాయని భారత వాతావరణ శాఖ హెచ్చరించింది.
ఈ క్రమంలో తుపానును ఎదుర్కొనేందుకు అన్ని చర్యలు చేపట్టింది కేరళ ప్రభుత్వం. ఇప్పటికే 2,849 సహాయక శిబిరాలను ఏర్పాటు చేసింది. లోతట్టు ప్రాంతాల ప్రజలను శిబిరాలకు తరలిస్తున్నట్లు ముఖ్యమంత్రి పినరయి విజయన్ తెలిపారు. మరో మూడు రోజుల పాటు చేపల వేటకు వెల్లటాన్ని నిషేధించారు.
" రాష్ట్రానికి 8 ఎన్డీఆర్ఎఫ్ బృందాలు చేరుకున్నాయి. శుక్రవారానికి తుపాను తిరువనంతపురాన్ని తాకుతుందని నిపుణులు అంచనా వేస్తున్నారు. ప్రధాని మోదీతో కూడా తుపాను గురించి మాట్లాడాం. ప్రభుత్వం తీసుకుంటున్న చర్యలను వివరించాం. ప్రజలు ఎలాంటి ఆందోళన చెందవద్దు. రాష్ట్ర ప్రభుత్వం అన్ని రకాల చర్యలు చేపడుతోంది. ఇప్పటికే 175 కుటుంబాలకు చెందిన 690 మందిని 13 శిబిరాలకు తరలించాం. పతనంతిట్ట జిల్లాలో భారీ వర్షాలు కురిసే అవకాశం ఉన్నందున శబరిమలకు వచ్చే భక్తులపై వాతావరణాన్ని అనుసరించి ఆంక్షలు ఉంటాయి. "
- పినరయి విజయన్, కేరళ ముఖ్యమంత్రి.
రెడ్ అలర్ట్..
తిరువనంతపురం, కొల్లాం, పతనంతిట్ట, అలప్పుజా జిల్లాలో భారీ వర్షాలు కురిసే అవకాశం ఉన్నందున రెడ్ అలర్ట్ ప్రకటించింది వాతావరణ శాఖ. కొట్టాయం, ఎర్నాకులం, ఇడుక్కి జిల్లాలకు ఆరెంజ్ అలర్ట్ ప్రకటించింది.
తమిళనాడులో..
తుపాను బురేవి తమిళనాడులోని పంబన్, కన్యకుమారి మధ్య గురువారం రాత్రి నుంచి శుక్రవారం తెల్లవారు జామున తీరం దాటనున్నట్లు ఐఎండీ తెలిపింది. ఈ సమయంలో 70-80 కిలోమీటర్ల వేగంతో గాలులు వీస్తాయని, భారీ వర్షాలు పడతాయని వెల్లడించింది. ఈ క్రమంలో సహాయక చర్యలు చేపట్టింది ప్రభుత్వం. రాష్ట్రానికి ఇప్పటికే 2 ఎన్డీఆర్ఎఫ్ బృందాలు చేరుకున్నాయి.
బురేవి నేపథ్యంలో రామేశ్వరం తీరాన్ని సందర్శించారు రాష్ట్ర మంత్రి ఆర్బీ ఉదయ్కుమార్. తీరప్రాంత, లోతట్టు ప్రజలు సహాయక శిబిరాలకు వెల్లాలని కోరారు. సముద్రంలోకి చేపల వేటకు వెల్లిన మత్సకారులు ఇళ్లకు చేరినట్లు తెలిపారు.
ఇదీ చూడండి: ఆ సీఎంలకు మోదీ ఫోన్- 'బురేవి'పై ఆరా
