సినిమాల్లో కిడ్నాపర్లను పోలీసులు ఛేజ్ చేసి పక్క ప్రణాళికతో పట్టుకునే సీన్లు భలే థ్రిల్లింగ్గా ఉంటాయి. అలాంటివి వాస్తవంగా చూసే అవకాశం అరుదుగా లభిస్తుంది. కర్ణాటకలో నిజంగానే కిడ్నాపర్ల చెర నుంచి బాధితున్ని పోలీసులు చాకచక్యంగా విడిపించిన తీరు చాలా ఆసక్తికరంగా సాగింది. ప్రస్తుతం అందుకు సంబంధించిన వీడియో సామాజిక మాధ్యమాల్లో వైరల్గా మారింది.
ఇదీ జరిగింది..
ప్రాంతం.. కర్ణాటకలోని హసన్ జిల్లా.. సమయం.. బుధవారం ఉదయం..
కేరళలోని కాసరగోడ్కు చెందిన అన్వర్ అనే వ్యక్తిని ఆర్థికపరమైన వివాదం కారణంగా దుండగులు అపహరించారు. వారు కాసర్గోడ్ నుంచి కర్ణాటక సరిహద్దుకు వస్తున్నారనే సమాచారం హసన్ పోలీసులకు అందింది.
దీంతో వెంటనే అప్రమత్తమైన సక్లేశ్పుర్ అరకలగూడు, గోరూరు పోలీసులు.. కిడ్నాపర్ల కోసం కాపుకాశారు. వారి కారు అరకలగూడు చేరుకోగానే.. రోడ్డుకు అడ్డంగా ఓ లారీ, జేసీబీ అడ్డుగా పెట్టి పట్టుకోవాలనుకున్నారు.
పక్కా ప్రణాళికతో ఎదురుచూస్తున్న పోలీసులకు ఓ ట్విస్ట్ ఎదురైంది. వారు ఉన్న ప్రదేశానికి కిడ్నాపర్ల కారు చేరుకోగానే పోలీసులు ఒక్కసారిగా దాడిచేశారు. దీంతో కారును యూటర్న్ చేసి జారుకున్నారు నేరస్థులు. ఈ క్రమంలో సాహసించి కారు డోరు తీసిన పోలీసులు.. బాధితున్ని సురక్షితంగా బయటకు రప్పించారు. అయితే కిడ్నాపర్లు మాత్రం తప్పించుకున్నారు.
ఇదీ చూడండి: సీఎం పిల్లల కిడ్నాప్కు కుట్ర.. రాజకీయాల్లో సంచలనం!
