Karnataka Minister CD Case: కర్ణాటక కేబినెట్ మంత్రి, ఆయన కుమారుడిని బ్లాక్మెయిల్ చేశాడో వ్యక్తి. అడిగినంత డబ్బు ఇవ్వకపోతే వాళ్లకు చెందిన ఓ ప్రైవేటు వీడియోను సామాజిక మాధ్యమాల్లో పోస్టు చేస్తానని బెదిరించాడు. దీంతో మంత్రి కుమారుడు పోలీసులను ఆశ్రయించారు. వెంటనే వారు కేసు నమోదు చేసుకుని నిందితుడిని అదుపులోకి తీసుకున్నారు. అతడ్ని ఓ జ్యోతిషుడి కుమారుడు రాహుల్ భట్గా గుర్తించారు. ఈ వ్యవహారంతో ఇంకా ఎవవరెవరికి సంబంధాలు ఉన్నాయనే విషయంపై దర్యాప్తు ముమ్మరం చేశారు.
సీసీబీ పోలీసులు చెప్పిన వివరాల ప్రకారం.. కర్ణాటక సహకార మంత్రి ఎస్టీ సోమశేఖర్కు సంబంధించిన వీడియోనూ అతని వ్యక్తిగత కార్యదర్శికి నిందితుడు డిసెంబర్ చివరివారంలో పంపాడు. డబ్బులు ఇవ్వకపోతే ఫేస్బుక్, ట్విట్టర్లో దాన్ని పోస్టు చేస్తానని హెచ్చరించాడు. డిసెంబర్ 25 సోమశేఖర్ కుమారుడు నిశాంత్ ఈ విషయంపై పోలీసులకు ఫిర్యాదు చేశారు. తనతో పాటు తన తండ్రి రాజకీయ జీవితాన్ని దెబ్బ తీసేందుకు తన ప్రైవేటు వీడియోలోని చిత్రాలను పంపి ఓ ఆగంతుకుడు బెదిరించాడని పేర్కొన్నారు. తనకు వాట్సాప్ కాల్ కూడా చేసినట్లు తెలిపారు.
అనంతరం రంగంలోకి దిగిన పోలీసులు ఐదు రోజుల దర్యాప్తు అనంతరం రాహుల్ భట్ను అరెస్టు చేశారు. కోర్టులో హాజరుపరిచి ఐదురోజులు కస్టడీలోకి తీసుకున్నారు.
Minister Blackmail news
అయితే ఈ వ్యవహారంతో ఓ రాజకీయ నేత కుమార్తె సహా మరికొంత మందికి సంబంధం ఉన్నట్లు పోలీసులు అనుమానిస్తున్నారు. వీడియో పంపింది ఇందీ నియోజకవర్గ కాంగ్రెస్ ఎమ్మెల్యే యశ్వంత్ రావ్ పాటిల్ కూతురు మొబైల్ నంబర్ నుంచే అని ప్రాథమిక నిర్ధరణకు వచ్చారు.
యశ్వంత్ పాటిల్ కూడా ఈ విషయంపై స్పందించారు. మీడియా సమావేశంలో అన్ని వివరాలు వెల్లడిస్తానన్నారు.
ఇదీ చదవండి: పక్షవాతంతో బాధపడుతున్న కొడుకును చంపిన తండ్రి!
