'ఫోన్లో అమ్మ జ్ఞాపకాలు.. ఎలాగైనా తెచ్చివ్వండి' అంటూ మూడు నెలల క్రితం వేడుకున్న చిన్నారి ఎదురుచూపులు ఫలించాయి. కరోనాతో మరణించిన ఆమె తల్లి మొబైల్ ఫోన్ను గుర్తించారు పోలీసులు. దీంతో అమ్మే తన చెంత చేరువైందనే ఆనందంలో తేలుతోంది ఆ బాలిక.
ఏం జరిగిందంటే..
"కరోనాతో మే 16న మడికేరి ఆస్పత్రిలో మా అమ్మ చనిపోయింది. తన వద్ద ఉన్న ఫోన్ను ఎవరో ఎత్తుకెళ్లారు. మా అమ్మ జ్ఞాపకాలు అందులో ఉన్నాయి. దానిని ఎవరైనా తీసుకున్నా.. దొరికినా.. దయచేసి ఈ అనాథకు ఇవ్వండి," అంటూ ఈ ఏడాది మేలో కొడగు పాలనాధికారి, పోలీసులకు లేఖ రాసింది జిల్లాకు చెందిన హృతీక్ష.
తన తల్లి జ్ఞాపకాలకున్న ఏకైక ఆధారం ఆ ఫోనే అని చిన్నారి ఆవేదన వ్యక్తంచేసింది. ఈ లేఖపై స్పందించిన జిల్లా కలెక్టర్ వీలైనంత త్వరగా ఆ ఫోన్ను గుర్తించి చిన్నారికి అప్పగిస్తామని ఆ సమయంలో హామీఇచ్చారు.
జిల్లా యంత్రాంగం ఆదేశాల మేరకు ముమ్మరంగా గాలించారు పోలీసులు. ఈ నేపథ్యంలోనే ఆస్పత్రి స్టోర్ రూమ్ శుభ్రం చేస్తున్న సమయంలో సిబ్బందికి ఫోన్ కనిపించింది. దానిని వారు పోలీసులకు అందించారు. దీంతో చిన్నారిని స్టేషన్కు పిలిపించిన పోలీసులు.. ఫోన్ను తనకు ఇచ్చేశారు.
దీంతో పోలీసులకు కృతజ్ఞతలు తెలిపింది బాలిక.
"మా అమ్మ ఫొటోలు ఉన్న ఫోన్ దొరికింది. దీని కోసం ఎంతగానో ఎదురుచూశాను. చాలా సంతోషంగా ఉంది. పోలీసులకు ధన్యవాదాలు. నాకు కచ్చితంగా తెలుసు ఫోన్ దొరుకుతుందని. అదే నమ్మకంతో ఉన్నా. కానీ మా నాన్నే ఫోన్పై ఆశలు వదిలేసుకున్నారు."
-హృతీక్ష, బాలిక
కాగా, చివరకు ఫోన్ దొరకడం ఆనందాన్నిచ్చిందని చిన్నారి చెప్పింది.
ఇదీ చూడండి: ఒక్క లేఖతో చిన్నారి కుటుంబంలో 'దీపావళి' వెలుగులు
