బెంగళూరులోని ఫోర్టిస్ ఆస్పత్రి వైద్యులు అరుదైన ఘనత సాధించారు. అఫ్గానిస్థాన్ కాబుల్కు చెందిన ఓ 27 ఏళ్ల మహిళకు అతి క్లిష్టమైన చిన్న పేగు మార్పిడి శస్త్రచికిత్సను విజయవంతంగా నిర్వహించారు. చిన్నపేగు సంబంధిత సమస్యతో పాటు రక్తం గడ్డ కట్టే సమస్యతో బాధపడుతున్న ఆ మహిళకు వైద్యులు పునర్జన్మ ప్రసాదించారు.
బతకదన్నారు..
సదరు మహిళ ఐదు నెలలు గర్భిణీగా ఉన్నప్పుడు చిన్నపేగు సంబంధిత సమస్య మొదలైంది. కాబుల్ వైద్యులు.. చిన్నపేగు మార్పిడి చికిత్స తమ వద్ద అందుబాటులో లేకపోవడం వల్ల మహిళ ప్రాణాలు కాపాడగలమని ధీమాగా చెప్పలేకపోయారు. ఆమె బతికేందుకే కొద్దిపాటి అవకాశం మాత్రమే ఉందన్నారు. ఆమెకు టీపీఎన్(పైపుల ద్వారా) విధానంలో ఆహారాన్ని అందించడం ప్రారంభించారు. అయితే.. బెంగళూరులోని ఫోర్టిస్ ఆస్పత్రిని ఆమె ఆశ్రయించింది.
మూడు నెలలపాటు నిరీక్షణ..
పరీక్షల అనంతరం బెంగళూరు వైద్యులు.. చిన్నపేగు మార్పిడి శస్త్రచికిత్స చేసేందుకు సిద్ధమయ్యారు. కానీ, మూడు నెలలపాటు ఆమెను వెయిటింగ్ లిస్టులో ఉంచారు. టీపీఎన్ విధానంలో ఆమెకు సరైన ఆహారం అందక, దానికి తోడు దీర్ఘకాలిక వ్యాధులు వెంటాడగా ఆమె ఆరోగ్య పరిస్థితి రోజురోజుకు క్షీణిస్తూ వచ్చింది. ఈ క్రమంలో ఆమెకు రక్తంలో సమస్యలు ఎదురయ్యాయి. దాంతో వైద్యులు ఆమెకు 24 గంటలపాటు ఇంజెక్షన్లు, సెలైన్లు ఇస్తూ కాపాడుతూ వచ్చారు.
కరోనాతో లాక్డౌన్ విధించగా.. ఆమెకు తగిన దాత దొరకడం కష్టతరమైందని మహిళకు చికిత్స అందించిన వైద్యుడు డాక్టర్ మహేశ్ గోపశెట్టి తెలిపారు. అందుకే ఆమె 3 నెలలు పాటు ఎదురుచూడాల్సి వచ్చిందని చెప్పారు.
"కొవిడ్ జాగ్రత్తలు పాటిస్తూ అమె ప్రాణాల్ని కాపాడాలని మేం నిర్ణయించాం. మూడు నెలల తర్వాత బ్రెయిన్ డెడ్ అయిన ఓ దాత దొరికాడు. దాంతో వెంటనే మేం ఈ అవయవ మార్పిడి శస్త్రచికిత్స చేశాం. రక్తంలో గడ్డ కట్టే సమస్యలు ఆ మహిళకు ఉండగా శస్త్రచికిత్స చేయడం ఇబ్బందిగా మారింది. రక్తం గడ్డకట్టకుండా ఉండేందుకు బ్లడ్ థిన్నర్స్ను ఆమెకు అందించాం. దాంతో ఆమెకు రక్తస్రావ సమస్య ఎదురైంది. రక్తస్రావాన్ని ఆపేందుకు మరో శస్త్రచికిత్స నిర్వహించాల్సి వచ్చింది.
-డాక్టర్ గోపశెట్టి, ఫోర్టిస్ ఆస్పత్రి వైద్యుడు, బెంగళూరు
వైద్యులకు ధన్యవాదాలు
వివిధ విభాగాలకు చెందిన వైద్యుల సమన్వయంతో ఈ శస్త్రచికిత్సను తాము పూర్తి చేశామని వైద్యులు పేర్కొన్నారు. తన భార్యకు పునర్జన్మ ప్రసాదించారని వైద్యులకు మహిళ భర్త గులామ్ కృతజ్ఞతలు తెలిపారు.
"దాదాపు 7 నెలల కిందట నా భార్య తీవ్రమైన పొత్తికడుపు నొప్పితో బాధపడింది. చిన్నపేగుకు సమస్యలు ఉన్నట్లు తేలగా.. అఫ్గాన్ వైద్యులు పేగును తొలగించాలని అన్నారు. అయితే.. ఈ శస్త్రచికిత్స చేస్తే నా భార్య బతుకుతుందో లేదో చెప్పలేమని అన్నారు. ఈ వ్యాధికి చికిత్స అందించే ఆస్పత్రులు ఎక్కడ ఉన్నాయోనని అన్ని దేశాల్లో వెతికాం. చివరకు బెంగళూరులో ఫోర్టిస్ ఆస్పత్రి వైద్యులు ఈ చికిత్స నిర్వహించగలరని తెలుసుకుని ఆశ్రయించాం."
-గులాం, మహిళ భర్త
వైద్యుల కృషి ఫలితంగా ఇప్పుడు ఆ మహిళ మునపటిలా ఆహారాన్ని, పానీయాలను తీసుకోగలుగుతోంది. దాతతోపాటు, తనకు శస్త్రచికిత్స చేసిన డాక్టర్ గోపశెట్టి వైద్య బృందానికి తాను ఎల్లప్పుడూ రుణపడి ఉంటానని ఆమె చెప్పింది.
ఇదీ చూడండి: 15 రోజుల్లో 16 మంది అనుమానాస్పద మృతి!
ఇదీ చూడండి: పారిశుద్ధ్య కార్మికురాలు.. డిప్యూటీ కలెక్టరయ్యింది!
