నవ్వులు పూయిస్తున్న బైక్​ దొంగతనం- ఏమైందంటే?

ఆయనో దొంగ. మోటార్​ బైక్​లను మాత్రమే దొంగతనం చేస్తుంటాడు. అలానే మరొకటి చేద్దామని పక్కా స్కెచ్​ వేశాడు. అర్ధరాత్రికి ఎంచుకున్న బైక్​ దగ్గరకు చేరాడు. బండి స్టార్ట్​ చేస్తే అందరూ లేస్తారని గుట్టు చప్పుడు కాకుండా.. అక్కడ నుంచి నెమ్మదిగా తోసుకుంటూ ముందుకు సాగాడు. ఇంతలో ఏమైందోగానీ తిరిగి దొంగతనం చేసిన చోటుకే తెచ్చిపెట్టాడు. ఇలా ఎందుకు చేశాడు? అసలేం జరిగిందంటే..

కర్ణాటకలోని కలబురగి జిల్లాలో ఓ వ్యక్తి చేసిన బైక్​ దొంగతనం అందరి చేత నవ్వులు పూయిస్తుంది. అఫ్జల్​పురలోని ఆగ్రో రోడ్​లో ఉండే ఓ బైక్​ను దొంగతనం చేశాడో వ్యక్తి. సరిగ్గా అర్ధరాత్రి 12 గంటలకు బండి దగ్గరకు వెళ్లాడు. చుట్టుపక్కల ఎవరైనా లేస్తారని.. బైక్​ను కొంత దూరం నడిపించుకుంటూ వెళ్లాడు. తీరా కొంతదూరం వెళ్లాక.. కొట్టేసిన బండి స్టార్ట్ కాలేదు. అంతే.. అక్కడే వదిలేసి వెళ్లక, దొంగతనం చేసిన ప్రాంతంలోనే భద్రంగా తెచ్చిపెట్టాడు. ఈ దృశ్యాలు సీసీటీవీలో నిక్షిప్తమయ్యాయి. వీడియో చూసిన వారు తెగ నవ్వుకుంటున్నారు.

కొద్ది రోజుల వ్యవధిలోనే ఈ ప్రాంతంలో చాలా బైక్​లు చోరీకి గురైనట్లు స్థానికులు చెబుతున్నారు. వీటిపై పోలీస్​ శాఖ దృష్టి సారించాలని కోరుతున్నారు.

ఇదీ చూడండి: వైరల్-పోలీసులపై రాళ్లు రువ్విన గ్రామస్థులు!