భారత్కు వచ్చే కార్గో విమానాలను అనుమతించడం సహా.. రవాణా మార్గాలను తెరిచే ఉంచాలని చైనాకు విజ్ఞప్తి చేశారు విదేశాంగ మంత్రి జైశంకర్. చైనా విదేశీ వ్యవహారాల శాఖ మంత్రి వాంగ్ యీతో శుక్రవారం ఫోన్లో మాట్లాడిన ఆయన.. భారత్లోని సంస్థలు అక్కడి తయారీదారుల నుంచి కీలక ఉత్పత్తులను దిగుమతి చేసుకుంటున్నారని తెలిపారు.
అమెరికా సంస్థలు తమ ఔషధ వనరులను చైనా నుంచి భారత్కు పంపించడంలో ఇబ్బందులు ఎదుర్కొంటున్నాయి. చైనాకు చెందిన సిచువాన్ ఎయిర్లైన్స్.. విమానాలను రద్దు చేయడం వల్ల ఈ ప్రభావం పడింది. ఈ నేపథ్యంలో సమస్యను వాంగ్ యీ దృష్టికి తీసుకెళ్లారు జైశంకర్. సప్లై చైన్ ప్రాముఖ్యతను గుర్తు చేసినట్లు జైశంకర్ తెలిపారు. ఇటువంటి పరిస్థితుల్లో రవాణా విమానాల రాకపోకలను కొనసాగించాలని పేర్కొన్నారు. దీనిపై వాంగ్ యీ సానుకూలంగా స్పందించారని చెప్పారు.
కరోనా మహమ్మారిని ఎదుర్కొనే విషయంలో అవసరమయ్యే చర్యలు చేపట్టేందుకు భారత్ పూర్తిగా కట్టుబడి ఉందని జైశంకర్ ఈ సందర్భంగా స్పష్టం చేశారని విదేశాంగ శాఖ తెలిపింది. కరోనాపై పోరాడుతున్న భారత్కు సంఘీభావం తెలుపుతామన్న చైనా అభ్యర్థన మేరకు ఈ ఫోన్ కాల్ ఏర్పాట్లు చేసినట్లు వివరించింది. ప్రధాని మోదీకి చైనా అధ్యక్షుడు జిన్పింగ్ లేఖ రాసిన కొద్దిగంటలకే విదేశాంగ మంత్రుల మధ్య సంభాషణ జరగడం గమనార్హం.
తూర్పు లద్దాఖ్ అంశం
ఫోన్ కాల్ సందర్భంగా సరిహద్దు సమస్య చర్చకు వచ్చింది. తూర్పు లద్దాఖ్లో వీలైనంత త్వరగా బలగాల ఉపసంహరణ పూర్తి చేయాలని జైశంకర్.. వాంగ్ యీకి పిలుపునిచ్చారు. మాస్కో ఒప్పందానికి కట్టుబడి ఉండాలని కోరారు. పూర్తిస్థాయిలో ఈ ఒప్పందాన్ని అమలు చేయడంపై చర్చించినట్లు జైశంకర్ తెలిపారు.
అమెరికాతోనూ
మరోవైపు, అమెరికా విదేశాంగ మంత్రి ఆంటోనీ బ్లింకెన్తోనూ జైశంకర్ మాట్లాడారు. కరోనాపై సమర్థవంతంగా పోరాటం సాగించేందుకు భారత్కు అవసరమయ్యే వనరుల చర్చించినట్లు తెలిపారు. అమెరికా నుంచి వైద్య పరికరాల సరఫరా సహా ఆక్సిజన్ సప్లై పెంపు, వ్యాక్సిన్ ఉత్పత్తి విస్తృతి వంటి విషయాలపై చర్చించినట్లు చెప్పారు.
ఇదీ చదవండి- భారత్కు సాయం చేసేందుకు సిద్ధం: ఐరాస
