వామపక్ష తీవ్రవాదం బలంగా ఉండే ప్రాంతాల్లో భద్రతా కార్యకలాపాలు కత్తిమీద సాముతో కూడిన వ్యవహారం. ముఖ్యంగా దట్టమైన అడవుల్లో ఎప్పుడు ఏం జరుగుతుందోనని భయపడాల్సిన పరిస్థితి. ఇక్కడ విధులు నిర్వహించే ఐటీబీపీ భద్రతాధికారులకు శిక్షణ పొందిన ప్రత్యేక జాతి శునకాలు ఎప్పుడూ సహాయం అందిస్తుంటాయి. అందులో కే9 జాతి కుక్కలు ఎక్కువగా ఉంటాయి. వాటిలో ఒకటి సిబు.
ఏ శునకానికైనా వయస్సు పెరిగే కొద్దీ శక్తి తగ్గిపోతుంది. సిబు ఇందుకు భిన్నం. దాదాపు 10ఏళ్ల వయస్సున్నా.. ఎంతో చురుకుగా విధులు నిర్వహిస్తోంది. 'అసలు సిబుకు రిటైర్మెంట్ ఉంటుందా?' అని అధికారులే ఆశ్చర్యపోతున్నారు.
సిబుకు ఇప్పుడు తొమ్మిదేళ్ల ఎనిమిది నెలలు. తనకన్నా తక్కువ వయస్సున్న కుక్కలతో పోటీపడి మరీ విధులు నిర్వహిస్తోంది సిబు. ఎంతో చురుకుగా 14-25 కిలోమీటర్లు ప్రయాణించగలదు. భద్రతాదళాల వాహనాలకు ముందుండే 'వాన్గార్డ్'లో సిబు నిత్యం అప్రమత్తంగా ఉంటుంది. బాంబులు, పేలుడు పదార్థాలు, ఆకస్మిక దాడులను ముందే పసిగడుతుంది. ఇలా ఎన్నో సందర్భాల్లో బృందాన్ని కాపాడింది.
కే9ల రిటైర్మెంట్పై ఐటీబీపీ ఏడాదికోసారి సమీక్ష నిర్వహిస్తుంది. తాజాగా నిర్వహించిన పరీక్షల్లో.. సిబు అన్నీ పాసైపోయింది. ఫిట్నెస్ పరీక్షల్లో టాప్లో నిలిచింది.
ఐటీబీపీలో కే9 జాతి శునకాలకు ప్రాధాన్యం ఎక్కువే ఉంటుంది. శునకాలను 'హీరోలు'గా పరిగణిస్తారు. రిటైర్మెంట్ అనంతరం వాటి కోసం 'వెటరన్స్ హోం'లు ఎదురుచూస్తూ ఉంటాయి. అక్కడ వాటి బాగోగులు చూసుకునేందుకు ప్రత్యేక సిబ్బంది ఉంటారు.
సిబు ఇంకా చురుకుగానే ఉన్నా.. శునకానికి రిటైర్మెంట్ ఇవ్వాలని ఐటీబీపీ యోచిస్తోంది. ఇన్నేళ్లు సిబు చేసిన కృషికి ప్రతిఫలంగా రిటైర్మెంట్ జీవితాన్ని హాయిగా గడిపే అవకాశం ఇవ్వాలనుకుంటున్నట్టు అధికారులు తెలిపారు.
రిటైర్మెంట్ తర్వాత.. సిబు ఏసీ రైల్లో రాయ్పుర్ నుంచి ఛండీగఢ్ వెళుతుంది. అక్కడ ఉన్న ఎన్టీసీడీ(నేషనల్ ట్రైనింగ్ సెంటర్ ఫర్ డాగ్స్) సంరక్షణలో తన జీవితాన్ని గడుపుతుంది.
ఇదీ చూడండి:- శునకం కోసం విమానం బిజినెస్ కేబిన్ బుకింగ్
