ITBP Jawans Coaching: సరిహద్దులో రేయింబవళ్లు గస్తీ కాస్తూ దేశ ప్రజలకు రక్షణ కల్పిస్తారు ఇండో టిబెటన్ సరిహద్దు పోలీసులు(ఐటీబీపీ). ఇప్పుడు వారే మారుమూల గ్రామాల్లోని పిల్లలకు పాఠాలు బోధిస్తున్నారు. ఆదివాసీ పిల్లలు పోటీ పరీక్షల్లో విజయవంతమయ్యేందుకు కోచింగ్ ఇస్తున్నారు. నక్సల్స్ ప్రభావం అధికంగా ఉండే ఛత్తీస్గఢ్లోని కొండగావ్ జిల్లాలో పేద పిల్లల విద్యకు తమవంతు సాయంగా ఈ శిక్షణ ఇస్తున్నారు 29వ బెటాలియన్ ఐటీబీపీ జవాన్లు. నవోదవ, ఏకలవ్య పాఠశాలల్లో అడ్మిషన్లకు అర్హత సాధించేందుకు దాదాపు 200 మంది పిల్లలకు క్లాసులు చెబుతున్నారు. ముంజ్మెటా, ఫార్సగావ్, ఝారా, ధౌదై వంటి సుదూర గ్రామాలకు చెందిన విద్యార్థులు ఐటీబీపీ జవాన్లు చెప్పే తరగతులకు హాజరవుతున్నారు. తల్లిదండ్రులు కూడా పిల్లల భవిష్యత్తును దృష్టిలో ఉంచుకుని కోచింగ్కు పంపుతున్నారు.
ITBP Chhattisgarh: పిల్లలకు క్లాసులు చెప్పడమే కాకుండా వారికి అవసరమైన మెటీరియల్ను కూడా ఐటీబీపీ సిబ్బంది అందిస్తోంది. తమ వల్ల పేద విద్యార్థులు మంచి పాఠశాలల్లో అడ్మిషన్ పొందితే సంతోషిస్తామని చెబుతున్నారు. గత కొన్ని వారాలుగా కోచింగ్ ఇస్తున్నట్లు తెలిపారు. ఛత్తీస్గఢ్లో వావపక్ష అతివాదంపై పోరాడేందుకు 2009లో ఐటీబీపీ సిబ్బందిని మోహరించింది ప్రభుత్వం. గత కొన్ని సంవత్సరాలుగా ఇక్కడ పౌరుల కోసం ఐటీబీపీ ఎన్నో కార్యక్రమాలు చేపట్టింది. పిల్లలకు హాకీ, ఆర్చరీ, జూడో, అథ్లెటిక్స్లో శిక్షణ ఇచ్చింది. ఇప్పుడు పాఠాలు కూడా బోధిస్తోంది.
ఇదీ చదవండి: సరస్సులో కొట్టుకొచ్చిన రూ.2వేల నోట్ల కట్టలు
