కాంగ్రెస్ పార్టీలో అసంతృప్త నేతల సంఖ్య పెరుగుతోందా? అంటే అవుననే సమాధానం వినిపిస్తోంది. యువ నేతలు వరుసగా పార్టీని వీడటమే ఇందుకు నిదర్శనం. 2022లో ఉత్తర్ప్రదేశ్ అసెంబ్లీ ఎన్నికలు జరగనున్న తరుణంలో జితిన్ ప్రసాద పార్టీ మారటం కాంగ్రెస్కు పెద్ద దెబ్బగానే చెప్పుకోవచ్చు. ఆయన రాహుల్ గాంధీకి అత్యంత సన్నిహితుడిగా గుర్తింపు తెచ్చుకున్నారు. యూపీఏ హయాంలో కేంద్ర మంత్రిగా రెండుసార్లు బాధ్యతలు నిర్వర్తించారు.
అసెంబ్లీ ఎన్నికలకు ముందు జితిన్ ప్రసాద భాజపాలో చేరటం.. కాంగ్రెస్ పార్టీ వైఫల్యంగా చెప్పుకోవచ్చు. ఇలాంటి అసంతృప్త యువ నేతలు పార్టీలో తమకు భవిష్యత్తు లేదనే భావనకు వస్తున్నట్లు స్పష్టంగా తెలుస్తోంది. అదే.. పార్టీని వీడేందుకు కారణమవుతోంది. కొద్ది నెలల క్రితం కాంగ్రెస్ అధ్యక్షురాలు సోనియా గాంధీకి లేఖ రాసిన 23 మంది నేతల బృందంలో జితిన్ ప్రసాద ఒకరు. పార్టీ పనితీరుపై అసంతృప్తి వ్యక్తం చేయటం సహా సంస్థాగత మార్పులు చేయాల్సిన అవసరం ఉందని డిమాండ్ చేశారు.
జితిన్ తర్వాత ఎవరు?
రాహుల్ గాంధీ బృందంలో కీలకంగా ఉన్న వారిలో జోతిరాదిత్య సింధియా తర్వాత పార్టీ మారిన ప్రముఖ యువ నేత జితిన్ ప్రసాద. అయితే.. ఇక్కడితో ఆ జాబితా ముగిసే అవకాశాలు కనిపించడం లేదు. పార్టీ వ్యవహారాలపై సచిన్ పైలట్, మిళింద్ దేవ్రా అసంతృప్తిగా ఉన్నట్లు తెలుస్తోంది.
జితిన్ ప్రసాద పార్టీ వీడిన మరుసటి రోజునే.. మిళింద్ దేవ్రా ట్వీట్ చేశారు. "భారత్లో అతిపెద్ద పార్టీగా కాంగ్రెస్ తిరిగి పుంజుకుంటుందని నమ్ముతున్నా. మాకు ఇంకా బలమైన నాయకత్వం ఉంది. పార్టీని పూర్వస్థితికి అది తీసుకురాగలదు. నా స్నేహితులు, తోటివారు, విలువైన భాగస్వాములు మమల్ని విడిచిపెట్టలేదనే అనుకుంటున్నా" అని పేర్కొన్నారు.
సచిన్ పైలట్, అశోక్ గహ్లోత్ మధ్య విబేధాలు ఏడాది కాలంగా కొనసాగుతున్నాయి. ఆయనపై కొద్దినెలల క్రితం తిరుగుబాటు జెండా ఎగురవేశారు పైలట్. కానీ, హైకమాండ్ హామీతో పార్టీలోకి తిరిగివచ్చారు. అయినప్పటికీ ఈ విషయంపై చర్యలు తీసుకోవటంలో జాప్యంపై అసంతృప్తిగానే ఉన్నారు. భాజపాతో సచిన్ పైలట్ సంప్రదింపులు జరుపుతున్నారనే ఊహాగాహానాలు మళ్లీ వినిపిస్తున్నాయి.
కాంగ్రెస్కు పెద్ద దెబ్బ!
"జితిన్ ప్రసాద పార్టీని వీడటం కాంగ్రెస్కు పెద్ద ఎదురుదెబ్బ. కాంగ్రెస్ అభివృద్ధి కోసం పాటు పడిన ఎందరో యువ నేతలను కోల్పోయాం. జోతిరాదిత్య సింధియా కొద్ది రోజుల క్రితం పార్టీ వీడారు. ఇప్పుడు జితిన్ ప్రసాద. కాంగ్రెస్ ఆత్మపరిశీలన చేసుకోవాల్సిన అవసరం ఉందని నేను అనుకుంటున్నా. ఈ పరిణామాలతో ప్రస్తుతం భాజపా లాభపడుతోంది. "
- సంజయ్ ఝా, కాంగ్రెస్ మాజీ అధికార ప్రతినిధి.
అయితే.. కాంగ్రెస్ తన తప్పును ఒప్పుకుని, వచ్చే ఏడాది ఎన్నికలకు ముందు ఆత్మపరిశీలన చేసుకుంటుందా? లేదా? అనే ప్రశ్న తలెత్తుతోంది. ఈ విషయంపై రాజ్యసభలో ప్రతిపక్ష నేత మల్లిఖార్జున్ ఖర్గే కీలక వ్యాఖ్యలు చేశారు. "వెళ్లిపోయే వాళ్లు వెళ్లిపోతారు. వారిని మేము అడ్డుకోం. అది ఆయన(జితిన్ ప్రసాద) నిర్ణయం. ఇక్కడ కూడా ఆయనకు మంచి భవిష్యత్తు ఉంది. ఏదేమైనా ఇది దురదృష్టకరం" అని పేర్కొన్నారు.
భాజపాకు లాభం!
ఉత్తర్ప్రదేశ్లో కాంగ్రెస్ పరిస్థితి కొన్నేళ్లుగా ఆందోళనకరంగానే ఉంది. జితిన్ ప్రసాద పార్టీని వీడటం కాంగ్రెస్కు ఎదురుదెబ్బ మాత్రమే కాదు.. అది ఎన్నికల ఫలితాలపై ప్రభావం చూపనుంది. భాజపాకు లాభం చేకూరనుంది. జితిన్ కమలదళంలో చేరటం వల్ల బ్రాహ్మణ వర్గం భాజపా వైపు మళ్లే అవకాశమే ఎక్కువగా ఉంది.
ఇవీ చూడండి: భాజపాలో చేరిన కాంగ్రెస్ కీలక నేత
