తూర్పు లద్దాఖ్లో సైనిక ప్రతిష్టంభనను పరిష్కరించేందుకు భారత్, చైనా సైనికాధికారుల మధ్య జరిగిన చర్చలన్నింటిలోనూ.. డ్రాగన్ సేనకు సంబంధించిన ఒక 'బలహీనత' కొట్టొచ్చినట్లు కనిపించింది. ఈ అంశంలో అనేక కోణాలను వెలుగులోకి తెస్తూ , తనను ఎండగడుతున్న భారత మీడియాను ఎలా కట్టడి చేయాలో తెలియక గందరగోళానికి లోనవుతున్నట్లు స్పష్టమైంది. "పది విడతలుగా జరిగిన సైనిక చర్చలన్నింటిలోనూ ఈ అంశాన్ని చైనా బృందం లేవనెత్తుతోంది మీ మీడియాను కట్టడి చేయండి అని వారు మన బృందాన్ని కోరుతూనే ఉన్నారు" అని విశ్వసనీయ వర్గాలు 'ఈటీవీ భారత్'కు తెలిపాయి. మన అధికారులు ప్రతిసారీ మాది ప్రజాస్వామ్య దేశం. "ఇక్కడ మీడియాకు స్వేచ్ఛ ఉంటుందని వారికి తేల్చి చెప్పారు" అని పేర్కొన్నాయి. భారత మీడియా పనిచేసే తీరు చైనాకు పూర్తిగా బోధపడలేదని ఆ దేశం నుంచి వెలువడిన అనేక ప్రకటనలు కూడా సూచిస్తున్నాయి.
గత ఏడాది జూన్ 15న గల్వాన్ లోయలో రెండు దేశాల బలగాల మధ్య జరిగిన తీవ్ర ఘర్షణపై చైనా రక్షణ శాఖ అధికార ప్రతినిధి సీనియర్ కర్నల్ రెన్ గువోషియాంగ్ ఇటీవల మాట్లాడుతూ.. భారత మీడియాపై అసహనం వెళ్లగక్కారు. " నాటి ఘర్షణలో చైనా సైనికుల మరణాలపై వాస్తవాలను వక్రీకరించింది. ప్రపంచ దేశాలనూ తప్పుదోవ పట్టించింది. చైనా బలగాలను దుర్భాషలాడింది" అని పేర్కొన్నారు. డ్రాగన్ తన అమర సైనికులను గౌరవించదని, వారి త్యాగాలకు గుర్తింపు ఇవ్వదని భారత మీడియాలో వచ్చిన విమర్శనాస్త్రాల కారణంగానే ఆ దేశం ఎట్టకేలకు నోరు విప్పిందని చెప్పారు. గల్వాన్ ఘర్షణలో నలుగురు సైనికులు మరణించారని అంగీకరించాల్సి వచ్చిందన్నారు.
ఇదీ చూడండి: భారత గగనతలం మీదుగా ఇమ్రాన్ విమానం
