తూర్పు లద్దాఖ్‌లో ఏడాదిన్నరగా కయ్యానికి కాలుదువ్వుతున్న చైనాకు మరింత సవాల్‌ విసిరే దిశగా భారత్ కీలక విజయం సాధించింది. 5వేల కిలోమీటర్ల లక్ష్యాలను అత్యంత కచ్చితత్వంతో ఛేదించగల అగ్ని-5 బాలిస్టిక్ క్షిపణి ప్రయోగాన్ని భారత్ విజయవంతంగా పూర్తి చేసింది. ఒడిశాలోని ఏపీజే అబ్దుల్ కలాం దీవి నుంచి బుధవారం రాత్రి ఏడు గంటల 50 నిమిషాలకు ఈ ప్రయోగాన్ని జరిపింది. ఉపరితలం నుంచి ఉపరితల లక్ష్యాలను ఈ క్షిపణి ఛేదించగలదు.
చైనా వద్ద ఉన్న 12వేల నుంచి 15వేల కిలోమీటర్ల లక్ష్యాలను ఛేదించే డాంగ్‌ఫెంగ్‌-41 క్షిపణికి పోటీగా అణ్వాయుధ సామర్ధ్యాన్ని పెంచుకోవడమే లక్ష్యంగా భారత్ అగ్ని-5ను అభివృద్ధి చేసింది. 17 మీటర్ల పొడవుండే అగ్ని-5 క్షిపణి 1.5 టన్నుల వార్‌హెడ్‌లను మోసుకువెళ్లగలదు. రక్షణ పరిశోధన, అభివృద్ధి సంస్ధ డీఆర్డీఓ దీనిని అభివృద్ధి చేసింది. ఘన ఇంధనంతో మూడు దశల్లో పని చేసే ఇంజన్‌ సాయంతో ఇది ముందుకు సాగుతుందని రక్షణ మంత్రిత్వ శాఖ తెలిపింది.
భారత్ తన ఆయుధాలను మొదటగా ఉపయోగించదు అనే విధానానికి అనుగుణంగానే అగ్ని-5 ప్రయోగం జరిపినట్లు రక్షణ మంత్రిత్వ శాఖ ఓ ప్రకటనలో తెలిపింది.
అగ్ని-5 ఖండాంతర క్షిపణి ప్రాజక్టు పని దశాబ్దం క్రితం ప్రారంభం కాగా, దీనిని ఏడు సార్లు ప్రయోగించారు. ఇప్పటికే భారత సైన్యంలో మోహరించిన అగ్ని-1 నుంచి అగ్ని-4 శ్రేణి క్షిపణులు 7వందల నుంచి 3వేల 5వందల కిలోమీటర్ల లక్ష్యాలను ఛేదించే సామర్ధ్యాన్ని కల్గి ఉన్నాయి.
భారత్ 2021 జూన్‌లో 2వేల కిలోమీటర్ల లక్ష్యాలను ఛేదించగల అణ్వాయుధ సామర్ధ్య అగ్ని బాలిస్టిక్ క్షిపణి ప్రయోగాన్ని విజయవంతంగా పూర్తి చేసింది. భారత వ్యూహాత్మక ఆయుధ సంపత్తిని పర్యవేక్షిస్తున్న వ్యూహాత్మక బలగాల కమాండ్‌లో అగ్ని-5 చేర్చేందుకు తాజా ప్రయోగ విజయం వీలు కల్పించనుంది. అగ్నిశ్రేణి క్షిపణి వ్యవస్ధలో సృజనాత్మక నిర్దేశం, నియంత్రణ యంత్రాంగాలు, దేశీయంగానే రూపొందించిన నావిగేషన్‌ వ్యవస్ధ అనేక అత్యాధునిక సాంకేతికలను వినియోగించారు.
ఇవీ చదవండి:
