తూర్పు లద్దాఖ్లో చైనాతో సరిహద్దు వివాదం కొనసాగుతున్న వేళ ఆ దేశ విదేశాంగ మంత్రి వాంగ్ యీతో శుక్రవారం దిల్లీలో భేటీ అయ్యారు భారత విదేశాంగ మంత్రి ఎస్ జైశంకర్. సరిహద్దు వివాదాన్ని పరిష్కరించుకునే అంశంపై ప్రస్తుతం చర్చలు కొనసాగుతున్నాయని చెప్పారు. తూర్పు లద్దాఖ్ అంశంపై భారత్-చైనా మధ్య ప్రస్తుత పరిస్థితిని చక్కదిద్దే పని పురోగతిలో ఉందని, అయితే, నెమ్మదిగా సాగుతోందన్నారు. సరిహద్దుల వద్ద సాధారణ స్థితి నెలకొంటేనే సంబంధాల పునరుద్ధరణ జరుగుతుందని పేర్కొన్నారు.
వాంగ్ యీతో సమావేశం అనంతరం విలేకరులతో మాట్లాడారు జైశంకర్. సరిహద్దు వివాదం పరిష్కారంపై వాంగ్ యీతో సుమారు 3 గంటల పాటు చర్చించినట్లు చెప్పారు. ఏప్రిల్ 2020 నుంచి చైనా తీసుకుంటున్న చర్యల కారణంగా ద్వైపాక్షిక సంబంధాలపై ప్రభావం పడినట్లు గుర్తుచేశామన్నారు.
" సీనియర్ మిలిటరీ కమాండర్స్ మధ్య 15వ విడత చర్చలు ఇటీవల జరిగాయి. దీంతో బలగాల ఉపసంహరణపై పలు ఫ్రిక్షన్ పాయింట్ల వద్ద పురోగతి కనిపించింది. వివాదం సద్దుమణిగేందుకు బలగాల ఉపసంహరణ పూర్తి చేయటం అవసరం. ఆ దిశగా చర్చలను ముందుకు తీసుకెళ్లాలి. ప్రస్తుత పరిస్థితిలో పురోగతి ఉందని చెప్పగలను. అయితే, అది నెమ్మదిగా సాగుతోంది. ఆ ప్రక్రియను మరింత ముందుకు తీసుకెళ్లటమే ప్రధానంగా చైనా విదేశాంగ మంత్రి వాంగ్ యీతో చర్చించాం. గత రెండేళ్లుగా ఇరు దేశాల సంబంధాలపై సరిహద్దు వివాదం ప్రభావం స్పష్టంగా కనిపిస్తోంది. సరిహద్దులో శాంతి, సామరస్యం అనేవి స్థిరమైన, సహకార సంబంధాలకు పునాదులు."
- ఎస్ జైశంకర్, విదేశాంగ మంత్రి.
భారత్ పట్ల స్వతంత్ర విధానం పాటిస్తారని ఆశిస్తున్నాం: చైనా విదేశాంగ మంత్రి వాంగ్ యీ ఓఐసీలో చేసిన వ్యాఖ్యలను తిప్పికొట్టారు జైశంకర్. ఈ విషయంపై చర్చించినట్లు చెప్పారు. భారత్ విషయంలో ఇతర దేశాల ప్రభావం లేకుండా చైనా స్వతంత్ర విధానాన్ని అవలంబిస్తుందని ఆశిస్తున్నట్లు వాంగ్ యీకి తెలిపామన్నారు. ఇరు దేశాల మధ్య ద్వైపాక్షిక సంబంధాలు సాధారణ స్థితికి చేరుకోవాలని కోరుకుంటున్నట్లు వాంగ్ యీ పేర్కొన్నారని చెప్పారు. అయితే, స్థిరమైన సంబంధాలను భారత్ కోరుకుంటుందని స్పష్టం చేసినట్లు తెలిపారు.
ఇదీ చూడండి: 'తూర్పు లద్దాఖ్ నుంచి చైనా పూర్తిగా వైదొలగాల్సిందే!'
