లోన్యాప్ సంస్థల వేధింపులకు సంబంధించి కేంద్ర దర్యాప్తు సంస్థలు చర్యలను ముమ్మరం చేశాయి. ఈనెల 9న ఓ ఫిన్టెక్ కంపెనీ కేసులో ఆదాయపన్ను శాఖ ఆ సంస్థ కార్యాలయాలపై దాడులు జరిపింది. దిల్లీ, గురుగ్రామ్లో జరిగిన ఈ రైడ్లలో కీలక ఆధారాలను సేకరించినట్లు కేంద్ర ప్రత్యక్ష పన్నుల బోర్డు (సీబీడీటీ) బుధవారం వెల్లడించింది.
వినియోగదారులకు ఇన్స్టెంట్ లోన్స్ అందించే ఈ సంస్థ.. లోన్ ఇచ్చే సమయంలో భారీ మొత్తంలో ఫీజు వసూలు చేస్తున్నట్లు అధికారులు తెలిపారు.
ఏడాదిలో రూ.10 వేల కోట్లు!
కేమన్ ఐలాండ్కు చెందిన ఓ గ్రూప్ ఈ సంస్థను నిర్వహిస్తోందని.. భారత్లో ఈ సంస్థ నిర్వహణ బాధ్యతలను పొరుగు దేశానికి చెందిన ఓ వ్యక్తి చేపడుతున్నట్లు అధికారులు వెల్లడించారు. ఎఫ్డీఐ రూపంలో ఈ సంస్థ ఇక్కడ స్థాపించిన ఏడాదిలోనే రూ.10వేల కోట్ల టర్న్ఓవర్ను నమోదు చేసినట్లు తెలిపారు.
సంస్థ నిర్వహణ కోసమంటూ ఇప్పటివరకు రూ.500 కోట్లను విదేశాల్లో ఉన్న సంస్థలకు బదిలీ చేసినట్లు తమ దర్యాప్తులో వెల్లడైందన్నారు అధికారులు. అయితే దర్యాప్తులో ఈ డబ్బంతా బోగస్ సంస్థలకు చేరినట్లు తేలిందని.. ఇందుకు సంబంధించి ఆధారాలు కూడా సేకరించామని తెలిపారు. అంతేకాకుండా.. ఈ యాప్ సాంకేతిక నిర్వహణ కూడా విదేశాల నుంచే జరుగుతున్నట్లు తెలిపారు.
రైడ్లో భాగంగా విదేశీయులు సహా ఈ సంస్థలో కీలక వ్యక్తుల వాంగ్మూలాలు సేకరించినట్లు అధికారులు స్పష్టం చేశారు.
ఇదీ చూడండి : కొవిడ్ సెంటర్లో నకిలీ రోగులు.. రూ.10 వేలకు ఆశపడి...
