నైరుతి ర్వైలే శాఖకు చెందిన హుబ్లీ డివిజన్ అధికారులు వినూత్న కార్యాచరణ చేపట్టారు. శుక్రవారం తొలిసారి ఏసీ కోచ్ల్లో చాక్లెట్లు, ఇతర ఆహార పదార్థాలను రవాణా చేశారు. ఈ ఆహార పదార్థాలను తరలించడానికి తక్కువ ఉష్ణోగ్రత కావాల్సినందున ఏసీ కోచ్లను వినియోగించారు.
అక్టోబరు 8న గోవాలోని వాస్కోడ గామా నుంచి దిల్లీలోని ఓఖ్లాకు వెళ్లే ఏసీ పార్సిల్ ఎక్స్ప్రెస్ రైలులో ఈ ఆహార పదార్థాలను తరలించారు. 18 ఏసీ కోచ్ల్లో ఏవీజీ లాజిస్టిక్స్ చెందిన 163 టన్నుల బరువున్న చాక్లెట్లు, నూడిల్స్ను రవాణా చేశారు. 2,115 కిలోమీటర్ల దూరం ప్రయాణించి, ఈ రైలు శనివారం దిల్లీకి చేరుకుందని అధికారులు తెలిపారు. దీని వల్ల రైల్వేకు రూ.12.83 లక్షల ఆదాయం సమకూరిందని చెప్పారు.
హుబ్లీ డివిజన్కు చెందిన బిజినెస్ డెవలప్మెంట్ యూనిట్(బీడీయూ) అధికారులు... ఈ సరకు రవాణాలో కీలక పాత్ర పోషించారు. సాధారణంగా ఈ తరహా వస్తువులను రోడ్డు మార్గం ద్వారా తరలిస్తారు. కానీ, రైల్వేలో తరలించడం ఇదే మొదటిసారి. బీడీయూ అధికారుల కృషిని డివిజనల్ రైల్వే మేనేజర్ అరవింద్ మల్ఖెడే ప్రశంసించారు. వేగవంతమైన, సున్నితమైన, తక్కువ ఖర్చుతో కూడిన సేవలను వినియోగదారులకు రైల్వేశాఖ అందిస్తోందని చెప్పారు.
ఫుల్ ఆదాయం..
రైల్వే ద్వారా సరకు రవాణా చేయడాన్ని పరిశ్రమలు, వ్యాపారులు అభినందిస్తున్నారని నైరుతి రైల్వే ఓ ప్రకటనలో తెలిపింది. 2020 అక్టోబరు నుంచి నెలవారీగా రూ.కోటి విలువ చేసే సరకు రవాణా అవుతోందని పేర్కొంది. ఈ ఆర్థిక సంవత్సరంలో రూ.11.17 కోట్లను ఆర్జించినట్లు చెప్పింది.
ఇవీ చూడండి:
