కేరళలోని కోజికోడ్లో ఉన్న ఈ ఇంట్లో బిజు అతని కుటుంబంతో గత ఐదేళ్లుగా నివాసం ఉంటున్నారు. ఇన్నిరోజులు ప్రశాంతంగా ఉన్న ఆ ఇంట్లో ఇప్పుడు ఉన్నట్టుండి వింత శబ్దాలు మొదలయ్యాయి. నేలలో సుత్తితో కొడుతున్నట్లు, ఇలా విచిత్రమైన శబ్దాలు బిజు ఇంట్లో ప్రతిధ్వనిస్తున్నాయి. అసలు ఆ శబ్దాలు ఎందుకు, ఎలా వస్తున్నాయో అక్కడి వారికి అంతుచిక్కడం లేదు.
బిజు ఇంట్లో ఈ గందరగోళం మొదలై సుమారు రెండు వారాలకు పైనే అవుతోంది. పగలూ రాత్రి అనే తేడా లేకుండా శబ్దాలు మారుమోగుతున్నాయి. నిశ్శబ్దంగా ఉన్న తమ ఇంట్లో ఇలా జరుగుతుండటం వల్ల ఇంట్లోని వారు కంగారు పడ్డారు. అసలు అవి ఎందుకు వస్తున్నాయో.. ఎక్కడ నుంచి వస్తున్నాయో అంతుచిక్కడం లేదు. ఇల్లంతా వెతికినా ఫలితం లేకపోయింది. దీంతో బిజు, ఈ సమస్య పరిష్కారం కోసం మంత్రి ఏకే సశీంద్రన్ను మంగళవారం కలిశారు. బిజు ఇంటిని పరిశీలించిన మంత్రి, సమస్య పరిష్కారం కోసం తగిన చర్యలు చేపడతామని హామీ ఇచ్చారు. మంత్రి ఆదేశాల మేరకు భూగర్భ శాస్త్రవేత్తలు బుధవారం.. బిజు ఇంటికి వచ్చి పరీక్షించారు. పూర్తి పరిశోధన తర్వాతే.. అసలు విషయం బయటపడే అవకాశముంది.
ఇటీవల ఈ చుట్టుపక్కల ప్రాంతాల్లో భారీ ఎత్తున భూమిని చదును చేసే పనులు జరిగాయని.. ఈ విచిత్రమైన శబ్దాల వెనుక అదే కారణమై ఉండొచ్చని స్థానికులు అభిప్రాయపడుతున్నారు.
ఇదీ చూడండి : రైతుల కోసం విద్యార్థుల ఆవిష్కరణ- జాతీయ అవార్డు దాసోహం
