'సింధియా.. భాజపాలో ఎప్పటికీ సీఎం కాలేరు'

గతేడాది.. హస్తం పార్టీని వీడి కమలం గూటికి చేరిన జ్యోతిరాదిత్య సింధియాపై కీలక వ్యాఖ్యలు చేశారు కాంగ్రెస్​ నేత రాహుల్​ గాంధీ. సింధియా భాజపాలో ఉంటే ఎప్పటికీ సీఎం పదవిని అధిష్ఠించలేరన్న రాహుల్​.. పార్టీలో ఆయన చివరి స్థానంలో నిలిచారని పేర్కొన్నారు.

ఏడాది క్రితం హస్తంను వీడి భారతీయ జనతా పార్టీ గూటికి చేరిన జ్యోతిరాదిత్య సింధియాను ఉద్దేశించి కాంగ్రెస్ నేత రాహుల్‌ గాంధీ కీలక వ్యాఖ్యలు చేశారు. సింధియా కాంగ్రెస్‌లో ఉండి ఉంటే ఎప్పటికైనా ముఖ్యమంత్రి అయ్యేవారని అన్నారు.

అయితే.. భాజపాలోకి వెళ్లి ఆ పార్టీలో సింధియా చివరి వ్యక్తి(బ్యాక్‌ బెంచర్‌)గా నిలిచారని ఎద్దేవా చేశారు రాహుల్. దిల్లీలో జరిగిన కాంగ్రెస్‌ యువజన సమావేశంలో పాల్గొన్న రాహుల్​.. ఈ వ్యాఖ్యలు చేసినట్లు సంబంధిత వర్గాలు తెలిపాయి. ఎప్పటికైనా ముఖ్యమంత్రివి అవుతావని సింధియాకు చెప్పిన విషయాన్ని రాహుల్ గుర్తు చేశారని పేర్కొన్నాయి.

ఇదీ చదవండి: మిథున్‌ 'చక్రం'.. భాజపా కొత్త అస్త్రం!