Gujarat Election Result 2022 : 27 ఏళ్లుగా గుజరాత్లో ఏకచక్రాధిపత్యం చెలాయిస్తున్న భారతీయ జనతా పార్టీ.. మరోసారి తన జోరును కొనసాగిస్తోంది. ఎగ్జిట్‌పోల్స్‌ అంచనాలకు తగ్గట్టే భాజపా ఆధిక్యం కనబరుస్తోంది. మిగతా పార్టీలకు అందనంత దూరంలో స్పష్టమైన ఆధిపత్యంతో దూసుకెళుతోంది. కాంగ్రెస్, ఆప్ను వెనక్కి నెడుతూ ఆధిక్యంలో కొనసాగుతోంది. గుజరాత్ ముఖ్యమంత్రి భూపేంద్ర పటేల్, మరో కీలక నేత హార్దిక్ పటేల్ ముందంజలో ఉన్నారు. ఈసారి భాజపా విజయం సాధిస్తే వరుసగా ఏడోసారి గెలిచి అత్యధిక కాలం అధికారంలో ఉన్న పార్టీగా రికార్డు సృష్టించనుంది.
వరుసగా ఏడోసారి?
గుజరాత్లో అధికార భాజపా వరుసగా ఏడోసారి జయభేరి మోగించాలని ఊవిళ్లూరుతోంది. ఎగ్జిట్‌ పోల్స్‌ కూడా భాజపా విజయం తథ్యమని అంచనా వేశాయి. గుజరాత్లో అధికారం చేపట్టేందుకు అవసరమైన మెజార్టీ మార్క్‌ 92 సీట్లు కాగా ఎగ్జిట్‌ పోల్స్‌ ప్రకారం భాజపాకు 117 నుంచి 151 సీట్ల వరకు రావచ్చని లెక్కగట్టాయి. కాంగ్రెస్ పార్టీకి 16 నుంచి 51, ఆమ్‌ఆద్మీకి 2 నుంచి 13 సీట్లు వచ్చే అవకాశం ఉందని అంచనా వేశాయి.
వామపక్షాల రికార్డు బద్దలు!
27ఏళ్లుగా గుజరాత్లో అధికారంలో ఉన్న భారతీయ జనతా పార్టీ.. వరుసగా ఏడోసారి పట్టు నిలబెట్టుకోవాలని భావిస్తోంది. ఈసారి కూడా అధికారం భాజపా వశమైతే బంగాల్‌లో వామపక్ష కూటమి పేరిట ఉన్న రికార్డ్‌ను చేరుకుంటుంది. బంగాల్‌లో వామపక్ష కూటమి వరుసగా ఏడుసార్లు గెలిచి.. 2011వరకు అధికారంలో కొనసాగింది.
2017 ఎన్నికల్లో..
2017 అసెంబ్లీ ఎన్నికల్లో భాజపా 99 సీట్లు, కాంగ్రెస్ 77 సీట్లు గెలుచుకున్నాయి. బీటీపీకి రెండు, ఎన్సీపీకి ఒకటి, ముగ్గురు స్వతంత్రులు విజయం సాధించారు. ఈ ఏడాది ఎన్నికలు జరిగే సమయానికి భాజపా సభ్యుల సంఖ్య 110కు చేరింది. కాంగ్రెస్ ఎమ్మెల్యేల సంఖ్య 60కి తగ్గింది. గత ఐదేళ్లలో కాంగ్రెస్ టికెట్‌పై గెలిచిన 20 ఎమ్మెల్యేలు భాజపాలో చేరారు. వారిలో ముగ్గురు ఎన్నికలకు ముందు పార్టీ మారారు.
