'లవ్​ జిహాద్​' బిల్లుకు గుజరాత్ అసెంబ్లీ ఆమోదం​

బలవంతపు మతమార్పిడులను అడ్డుకునే మతస్వేచ్ఛ బిల్లును గుజరాత్​ అసెంబ్లీ ఆమోదించింది. ఇది అమల్లోకి వస్తే నిందితులకు పదేళ్ల వరకు జైలుశిక్షతో పాటు జరిమానా విధించే అవకాశం ఉంటుంది.

బలవంతపు మతమార్పిళ్లకు అడ్డుకట్ట వేసేందుకు తీసుకొచ్చిన 'లవ్​ జిహాద్​' బిల్లుకు గుజరాత్​ అసెంబ్లీ ఆమోదం తెలిపింది. ఇది అమలులోకి వస్తే మోసపూరిత వివాహాలు, ఇతర మార్గాల ద్వారా మతమార్పిళ్లకు పాల్పడేవారికి 10 ఏళ్ల వరకు శిక్ష పడుతుంది. అంతేగాక రూ.3 లక్షల వరకు జరిమానా విధించే అవకాశం ఉంది.

2003లో అమల్లోకి తీసుకొచ్చిన ఈ చట్టానికి సవరణలు ప్రతిపాదించగా.. గుజరాత్ ప్రీడమ్​ ఆఫ్​ రిలీజియన్ (సవరణ) బిల్లు-2021ను ఆమోదించింది. అయితే ఓటింగ్​లో ప్రధాన ప్రతిపక్ష పార్టీ కాంగ్రెస్​.. ఈ బిల్లుకు వ్యతిరేకంగా ఓటు వేసింది.

భాజపా పాలిత రాష్ట్రాలైన మధ్యప్రదేశ్​, ఉత్తర్​ప్రదేశ్​ ఇటువంటి చట్టాన్ని అమల్లోకి తీసుకొచ్చాయి.

లవ్ జిహాద్ అంటే..

ఇటీవలి కాలంలో పలు భాజపా పాలిత రాష్ట్రాలు ఈ తరహా చట్టాలు తీసుకొస్తున్నట్లు ప్రకటించాయి. ప్రేమ, పెళ్లి పేరిట హిందూ మహిళలను బలవంతంగా ఇస్లాం మతంలోకి మారేలా చేస్తున్నారని, వాటిని అరికట్టేందుకు ఈ ఆర్డినెన్సులు ఉపయోగపడతాయని చెబుతున్నాయి. ఈ బలవంతపు మత మార్పిడులనే 'లవ్​ జిహాద్​'గా అభివర్ణిస్తున్నాయి.

ఇదీ చూడండి: 'గల్ఫ్​ కార్మికుల ఆదాయంపై పన్ను ఉండబోదు'