వ్యవసాయ చట్టాల వల్ల కనీస మద్దతు ధర(ఎంఎస్పీ) రద్దవుతుందని రైతులు ఆందోళన వ్యక్తం చేస్తున్న నేపథ్యంలో కేంద్ర ప్రభుత్వం కీలక ప్రకటన చేసింది. ఇప్పటికే ఉన్న ఎంఎస్పీ పథకాల ద్వారా ఖరీఫ్ పంట కొనుగోళ్లను కొనసాగిస్తూనే ఉందని స్పష్టం చేసింది. ఇందుకు సంబంధించి గణాంకాలు విడుదల చేసింది.
2020-21 ఖరీఫ్ మార్కెటింగ్ సీజన్లో రూ.60,038.68 కోట్ల పంటను కొనుగోలు చేసినట్లు వినియోగదారుల వ్యవహారాల మంత్రిత్వ శాఖ వెల్లడించింది.
ఇదే సమయంలో వరి కొనుగోలు సైతం సాఫీగా జరుగుతోందని స్పష్టం చేసింది. పంజాబ్, హరియాణా, ఉత్తర్ప్రదేశ్, తెలంగాణా, ఉత్తరాఖండ్, తమిళనాడు, చండీగఢ్, జమ్ముకశ్మీర్, కేరళ, గుజరాత్, ఆంధ్రప్రదేశ్, ఒడిశా, మహారాష్ట్ర రాష్ట్రాల్లో వరి కొనుగోళ్లు చేపట్టినట్లు వివరించింది.
