BBMP Garbage Truck Accident: రోడ్డు దాటేందుకు ప్రయత్నించిన ఓ బాలికను మున్సిపల్ ట్రక్కు ఢీకొంది. ఈ ఘటనలో ఆమె అక్కడిక్కడే ప్రాణాలు కోల్పోగా మరో ఆరుగురు తీవ్రంగా గాయపడ్డారు. ఈ ఘటన కర్ణాటకలోని బెంగళూరులో ఆదివారం రాత్రి జరిగింది.
తొమ్మిదో తరగతి చదువుతున్న 13 ఏళ్ల అక్షయ.. హెబ్బల్ పోలీస్ స్టేషన్ పరిధిలోని అండర్ పాస్ వద్ద రోడ్డు దాటేందుకు ప్రయత్నించింది. డివైడర్ మీదగా రోడ్డు దాటాలని భావించింది. అయితే అదే సమయంలో వేగంగా దూసుకొస్తున్న బృహత్ బెంగళూరు మహానగర పాలికేకు (బీబీఎంపీ) చెందిన ట్రక్కు బాలికను ఢీకొంది. దీంతో ఆమె అక్కడిక్కడే ప్రాణాలు కోల్పోయింది. ట్రక్కు అదుపు తప్పడం వల్ల అక్కడే ఉన్న ఇతర వాహనాలు కూడా ప్రమాదానికి గురయ్యాయి. ఓ కారు, ద్విచక్రవాహనం ధ్వంసమయ్యాయి.
ఈ ఘటనలో తీవ్రంగా గాయపడిన ఆరుగురిని స్థానిక ఆస్పత్రికి తరలించారు. పరారీలో ఉన్న డ్రైవర్పై కేసు నమోదు చేసిన పోలీసులు దర్యాప్తు చేస్తున్నారు.
ఇదీ చూడండి : ఎమ్మెల్యేగా ఓడినా సీఎం ఆయనే.. పుష్కర్ సింగ్కే ఉత్తరాఖండ్ పగ్గాలు
