G23 Congress Leaders: ఐదు రాష్ట్రాల ఎన్నికల్లో కాంగ్రెస్ పార్టీ ఘోర పరాజయం పొందింది. ఇప్పటికే ఆ పార్టీ సీడబ్ల్యూసీ మీటింగ్ నిర్వహించగా.. బుధవారం జరిగిన జీ23 నేతల సమావేశం ప్రాధాన్యం సంతరించుకుంది. సీనియర్ నేత గులామ్ నబీ ఆజాద్ నివాసంలో జరిగిన ఈ భేటీలో పార్టీ బలోపేతంపై నేతలు తమ ప్రతిపాదనలు సూచించారు. వీటిని పార్టీ అధినేత్రి సోనియా గాంధీ దృష్టికి తీసుకెళ్లేందుకు గులామ్ నబీ ఆజాద్.. సోనియాతో గురువారం భేటీ అయ్యే అవకాశం ఉంది. ఈ సమావేశంలో రాహుల్-ప్రియాంక గాంధీలు కూడా పాల్గొననున్నట్లు తెలుస్తోంది.
అదొక్కటే మార్గం: జీ23 నేతలు
ఆజాద్ నివాసంలో సమావేశమైన జీ23 నేతలు.. పార్టీ బలోపేతం కావాలంటే ప్రతి స్థాయిలో సమష్టి, సమ్మిళిత నాయకత్వంతోనే సాధ్యమవుతుందని అభిప్రాయపడ్డారు. 2024 ఎన్నికల్లో భాజపాను గద్దెదించాలంటే కాంగ్రెస్ విధానాలకు దగ్గరగా ఉండే పార్టీలతో అధిష్ఠానం చర్చలు జరిపి కూటమిని ఏర్పాటు చేసే దిశగా అడుగులు వేయాలని పేర్కొన్నారు. దాదాపు నాలుగు గంటల పాటు సాగిన ఈ సమావేశంలో సీడబ్ల్యూసీ మీటింగ్లో తీసుకున్న నిర్ణయాలు, పార్టీ బలోపేతానికి గల మార్గాలపై నేతలు చర్చించారు.
గాంధీల నాయకత్వ మార్పుపై మౌనం!
అంతకుముందు.. జీ23 నేతల్లో ఒకరైన కపిల్ సిబల్ చేసిన వ్యాఖ్యలు పార్టీలో దూమారం రేపాయి. పార్టీ బలోపేతం చెందాలంటే నాయకత్వ బాధ్యతల నుంచి గాంధీ కుటుంబం తప్పుకోవాల్సిందే అని ఆయన చేసిన వ్యాఖ్యలపై మల్లికార్జున ఖర్గే వంటి సీనియర్ నేతలు, గాంధీ కుటుంబ మద్దతుదార్లు మండిపడ్డారు. ఈ నేపథ్యంలో జీ23 నేతల సమావేశంలో ఈ అంశంపై చర్చ జరిగే అవకాశం ఉందని అందరూ భావించారు. అయితే అందుకు భిన్నంగా.. సమావేశంలో ఈ నాయకత్వం మార్పు గురించి ప్రస్తావనే రాకపోవడం గమనార్హం.
ఈ సమావేశంలో కపిల్ సిబల్, భూపిందర్ సింగ్ హుడా, పృథ్వీరాజ్ చౌహాన్, మనీశ్ తివారీ, శశి థరూర్, రాజ్ బబ్బర్, అఖిలేశ్ ప్రసాద్ సింగ్, సందీప్ దీక్షిత్ వంటి సీనియర్లు పాల్గొన్నారు.
గులామ్ నబీ ఆజాద్.. ఈ సమావేశానికి సంబంధించిన పలు వివరాలను సోనియా గాంధీకి ఇప్పటికే ఫోన్లో తెలియజేసినట్లు సమాచారం.
ఇదీ చూడండి : జీ23 వర్గంపై 'గాంధీ' విధేయుల మాటలదాడి.. టార్గెట్ సిబల్!
