కర్ణాటకలోని బెంగళారులో ఓ యువతి స్కూటీని తగలబెట్టాడు ఆమె ప్రియుడు. తనను డ్రగ్స్ సరఫరా కేసులో జైలుకు పంపిందని కారణంతోనే ఈ చర్యకు పాల్పడినట్లు తెలిపాడు. అసలేం జరిగిందంటే?
పోలీసుల సమాచారం ప్రకారం..
హలసూరుకు చెందిన యువతి.. నిందితుడు విక్రమ్తో మూడేళ్లుగా ప్రేమలో ఉంది. అయితే తన ప్రియుడు మాదకద్రవ్యాల వ్యాపారంలో నిమగ్నమై ఉన్నాడని తెలుసుకున్న యువతి అతడిని మార్చేందుకు ప్రయత్నించింది. కానీ అతడిలో ఎటువంటి మార్పులేదు. దీంతో పోలీస్ స్టేషన్లో ఫిర్యాదు చేసినా.. అతడు మారుతాడేమోనని భావించింది. వెంటనే విక్రమ్ గురించి పోలీసులకు సమాచారం అందించింది.
రంగంలోకి దిగిన మడివాల పోలీసులు డ్రగ్స్ చలామణి కేసులో అతడిని అరెస్టు చేశారు. ఎనిమిది నెలల తర్వాత బెయిల్‌పై బయటకు వచ్చిన విక్రమ్ తన అరెస్టుకు యువతి కారణమని తెలుసుకున్నాడు. డిసెంబర్ 12న ఆమె ఇంటికి వెళ్లి స్కూటర్‌కు నిప్పంటించాడు. హలసూరు పోలీసులు కేసు నమోదు చేసి నిందితుడిని మళ్లీ అదుపులోకి తీసుకున్నారు.
