గుజరాత్లోని సూరత్లో నాలుగేళ్ల బాలికపై అత్యాచారానికి పాల్పడ్డాడు ఓ వ్యక్తి. మర్మాంగాలు, ముఖం, కంటిపై తీవ్రగాయాలై ఆస్పత్రిలో చికిత్స తీసుకుంటున్న బాధితురాలి పరిస్థితి విషమంగా ఉంది. ఈ ఘటనలో సీసీటీవీ ఫుటేజి అధారంగా నిందితుడిని పోలీసులు అదుపులోకి తీసుకున్నారు.
పోలీసులు తెలిపిన వివరాల ప్రకారం.. మధ్యప్రదేశ్కు చెందిన ఓ వ్యక్తి.. తన భార్య, ఇద్దరు కుమార్తెలతో ఉపాధి కోసం సూరత్కు వలస వచ్చాడు. వీరంతా గత కొన్నేళ్లుగా సూరత్లోనే నివసిస్తున్నారు. గురువారం సూరత్లోని ఓ నిర్మాణ స్థలంలో బాలిక తన తల్లిదండ్రులతో రాత్రి 9 గంటలకు నిద్రపోయింది. ఆ సమయంలో ఓ వ్యక్తి.. చిన్నారి నిద్రిస్తున్న సమయంలో నిర్మానుష్య ప్రదేశానికి తీసుకెళ్లి అత్యాచారానికి పాల్పడ్డాడు. దాదాపు రాత్రి రెండు గంటల సమయంలో చిన్నారి ఏడుస్తూ కనిపించింది. ఆమె తీవ్రంగా గాయపడి రక్తస్రావం అయింది. కంటిపై, ముఖంపై గాయాలు చూసి షాక్ గురైన తల్లిదండ్రులు చిన్నారిని ఆరా తీయగా.. సమాధానం చెప్పే పరిస్థితిలో బాలిక లేదు.
ప్రాణాపాయస్థితిలో ఉన్న బాధితురాలిని అంబులెన్సులో న్యూ సివిల్ ఆస్పత్రికి తరలించారు. వెంటనే అత్యవసర వార్డుకు తరలించి రెండు గంటలపాటు శస్త్ర చికిత్స చేశారు. బాలిక ఇంకా స్పృహలోకి రాలేదు. ఐసీయూలో ఉన్న ఆమె పరిస్థితి ఇంకా విషమంగానే ఉందని ఆస్పత్రి సూపరింటెండెంట్ డాక్టర్ గణేశ్ గోవేకర్ తెలిపారు.
సమాచారం అందుకున్న పోలీసులు.. ఘటనా స్థలానికి చేరుకుని ఆ పరిసరాల్లో ఉన్న సీసీటీవీ ఫుటేజీలను పరిశీలించారు. అనంతరం రంగంలోకి దిగి నిందితుడి కోసం ముమ్మరంగా గాలించారు. ఘటన జరిగిన కొన్ని గంటల్లోనే ఇచ్ఛాపుర్ ఆర్జేడీ పార్కు వద్ద నిందితుడిని అరెస్టు చేశారు. బాలిక కుటుంబ సభ్యుల ఫిర్యాదు మేరకు పోక్సో చట్టం కింద కేసు నమోదు చేశారు.
మూడున్నరేళ్ల బాలికపై రేప్.. ఆపై హత్య..
మరోవైపు ఈ ఏడాది ఫిబ్రవరిలో మూడున్నరేళ్ల చిన్నారిపై ఓ వ్యక్తి అత్యాచారం చేసి కిరాతకంగా చంపేశాడు. ఈ అమానుష ఘటన కర్మాటకలోని బెంగళూరులో జరిగింది.
పోలీసులు తెలిపిన వివరాల ప్రకారం.. బాధితురాలి తల్లి కావేరీనగర్లోని ఓ దుకాణంలో పని చేసేది. అక్కడే ఆమెకు 26 ఏళ్ల వయసున్న ఓ వ్యక్తితో పరిచయం ఏర్పడింది. దీంతో అతడు కూడా ఆమె ఇంట్లోనే ఉండేవాడు. ఆమె పనికి వెళ్లినప్పుడు కుమార్తెను చూసుకునేవాడు. మద్యం మత్తులో ఉన్న అతడు.. ఓ రోజు ఇంట్లో ఎవరూ లేని సమయంలో చిన్నారిపై అత్యాచారానికి పాల్పడి చంపేశాడు. ఇంతలో ఇంటికి వచ్చిన మహిళ.. కుమార్తెను చూసి షాక్కు గురైంది. దీనిపై అతడిని ప్రశ్నించగా.. ఆమెపై ఎదురుదాడికి దిగాడు. స్థానికులు సహాయంతో పోలీసులను ఆశ్రయించిన మహిళ.. నిందితుడిపై ఫిర్యాదు చేసింది. కేసు నమోదు చేసుకున్న పోలీసులు.. నిందితుడిని అదుపులోకి తీసుకుని విచారించగా.. అతడు నేరాన్ని అంగీకరించాడు. పూర్తి కథనం కోసం ఈ లింక్పై క్లిక్ చేయండి.
