కేరళ కాంగ్రెస్ (బి) ఛైర్మన్, ఆ రాష్ట్ర మాజీ మంత్రి ఆర్. బాలకృష్ణ పిళ్లై (86) కొట్టారకరాలోని ఓ ఆస్పత్రిలో చికిత్స పొందుతూ సోమవారం కన్నుమూశారు. వయసు సంబంధిత వ్యాధుల కారణంగా మృతి చెందినట్లు కుటుంబసభ్యులు వెల్లడించారు.
విద్యార్థి దశలోనే..
ఉన్నత కుటుంబంలో జన్మించిన పిళ్లై.. విద్యార్థి దశలోనే రాజకీయాల్లో ప్రవేశించారు. స్టూడెంట్ ఫెడరేషన్ సభ్యుడిగా ఉన్న పిళ్లై.. 1958లో కాంగ్రెస్ పార్టీలో చేరారు. 1960లో పతనపురం నియోజకవర్గం తరపున పోటీ చేసి 25 ఏళ్లకే ఎమ్మెల్యేగా ఎన్నికయ్యారు. 1964లో కాంగ్రెస్ను వీడి సీనియర్ నేత కేఎం జార్జితో కలిసి కేరళ కాంగ్రెస్ (బి)ని స్థాపించారు.
1971లో మవేలికర నియోజకవర్గం నుంచి పిళ్లై లోక్సభకు ఎన్నికయ్యారు.
ఆరు దశాబ్దాల సుదీర్ఘ రాజకీయ జీవితంలో కేరళ మాజీ ముఖ్యమంత్రులు సీ అచ్యుత మేనన్, కే కరుణాకరన్, ఈకే నాయనర్, ఏకే ఆంటోనీల కేబినెట్లో మంత్రిగా సేవలందించారు.
2017 నుంచి కేరళ స్టేట్ వెల్ఫేర్ కార్పరేషన్ ఫర్ ఫార్వర్డ్ కమ్యూనిటీస్కు ఛైర్మన్గా సేవలు అందిస్తున్నారు.
అవినీతి ఆరోపణలు..
ఇడమలయర్ హైడ్రోఎలక్ట్రిక్ ప్రాజెక్ట్కు సంబంధించి అవినీతికి పాల్పడ్డారన్న ఆరోపణలతో 2011 ఫిబ్రవరిలో సుప్రీంకోర్టు పిళ్లై సహా పలువురికి జైలు శిక్ష విధించింది.
ఇదీ చదవండి : పునరపి విజయం- చరిత్ర సృష్టించిన ఎల్డీఎఫ్!
