కర్ణాటక భాజపా ఎంపీ నళిన్ కుమార్ కటీల్ వివాదాస్పద వ్యాఖ్యలు చేశారు. పార్టీ కార్యకర్తలు.. రోడ్డు, మురుగునీటి సమస్యలను పట్టించుకోకుండా.. లవ్ జిహాద్పై దృష్టి పెట్టాలని చెప్పారు. ఇలాంటి చిన్న సమస్యలను పట్టించుకోకూడదని.. భాజపా మళ్లీ అధికారంలోకి వస్తే చిన్నారుల జీవితాన్ని నాశనం చేస్తున్న లవ్ జిహాద్కు అడ్డుకట్ట వేస్తామని పేర్కొన్నారు. సోమవారం మంగళూరులో జరిగిన పార్టీ కార్యకర్తల సమావేశం 'బూత్ విజయ అభియాన'లో పాల్గొన్న ఆయన.. ఈ వ్యాఖ్యలు చేశారు. పాపులర్ ఫ్రంట్ ఆఫ్ ఇండియాను నిషేధించకపోతే.. భాజపా నేతలు ప్రాణాలతో ఉండేవారు కాదన్నారు. కేంద్రం తీసుకున్న ఈ నిర్ణయంతో జాతీయవాదులు లాభపడ్డారని తెలిపారు. ప్రధానమంత్రి నరేంద్ర మోదీ, కేంద్ర హోమంత్రి అమిత్ షా నేతృత్వంలోని భాజపా ప్రభుత్వం వల్లే ఇది సాధ్యమైందని కొనియాడారు. పీఎఫ్ఐను బ్యాన్ చేయకపోతే.. వరుసగా హిందువుల హత్యలు జరిగేవన్నారు నళిన్ కుమార్.
"2014 నుంచి దేశంలో ఒక్క బాంబు పేలుడు కూడా జరగలేదు. ఇందుకు కారణం కేంద్రంలో అమిత్ షా, రాష్ట్రంలోని బసవరాజ్ బొమ్మై ప్రభుత్వం. గోహత్యలపై నిషేధం విధించిన విధంగానే.. లవ్ జిహాద్కు వ్యతిరేకంగా మరో చట్టాన్ని తీసుకువస్తాం. ఒకవేళ డీకే శివకుమార్ ముఖ్యమంత్రి అయితే ఉగ్రవాదులు ఏకంగా వీధుల్లోకే వస్తారు. కాంగ్రెస్కు ఓటు వేస్తే కుక్కర్ బాంబ్ నిందితులను విడుదల చేస్తారు. పీఎఫ్ఐ నిషేధాన్ని ఎత్తివేస్తారు. కాంగ్రెస్ అధికారంలోకి వస్తే లవ్ జిహాద్ మరింత పెరుగుతుంది. మతమార్పిళ్ల వ్యతిరేక చట్టాలను వెనక్కి తీసుకుంటారు. గోహత్యలకు అనుమతిస్తారు. నూతన కర్ణాటక కావాలో..? ఉగ్రవాదులకు అడ్డాగా మారే కర్ణాటక కావాలో..? నిర్ణయించుకోవాల్సిన అవసరం ప్రజలపై ఉంది."
- నళిన్ కుమార్, ఎంపీ మంగళూరు
ఎంపీ వ్యాఖ్యలపై మండిపడ్డ కాంగ్రెస్
మంగళూరు ఎంపీ నళిన్ కుమార్ చేసిన వ్యాఖ్యలపై కాంగ్రెస్ కర్ణాటక చీఫ్ డీకే శివకుమార్ మండిపడ్డారు. లవ్ జిహాద్పై ఆయన చేసిన వ్యాఖ్యలు తనను ఆశ్చర్యానికి గురిచేయలేదని.. భాజపాకు అభివృద్ధి, నిరుద్యోగంపై ఎప్పుడు దృష్టి పెట్టిందని ఎద్దేవా చేశారు. ఇప్పటికైనా భాజపా నిజాన్ని ఒప్పుకుందని పేర్కొన్నారు. కర్ణాటక ప్రజలు త్వరలోనే భాజపాకు సరైన గుణపాఠం చెపుతారని తెలిపారు.
ఇవీ చదవండి: ఆస్పత్రిలో చేరిన సోనియా గాంధీ.. శ్వాస సంబంధిత ఇన్ఫెక్షన్తో..!
2013లో తప్పిపోయిన మహిళ.. ఇన్నేళ్లకు భర్త చెంతకు.. ఎలా దొరికిందంటే?
