కొద్ది రోజులుగా కురిసిన భారీ వర్షాలు మహారాష్ట్రను అతలాకుతలం చేశాయి. వరదలు, కొండచరియల కారణంగా మంగళవారం (జులై 27) నాటికి 209 మంది చనిపోయారు. మరో 8 మంది గల్లంతయ్యారు. 58, 722 పశుపక్ష్యాదులు మృతిచెందాయి. 4,34,185 మందిని సురక్షిత ప్రాంతాలకు తరిలించినట్లు రాష్ట్ర విపత్తు నిర్వహణ విభాగం తెలిపింది.
ముంబయి, రాయ్గఢ్, రత్నగిరి, పాల్ఘడ్, ఠాణె, సింధుదుర్గ్, కోల్హాపుర్, సతారా, సంగ్లీ జిల్లాల్లో వర్షాలు కల్లోలం సృష్టించాయి. ప్రస్తుతం 16 ఎన్డీఆర్ఎఫ్, 3 ఆర్మీ బృందాలు సహాయక చర్యలు చేపడుతున్నాయి.
308 వసతి కేంద్రాల్లో 2.51 లక్షల మందికి భోజన, వసతి సౌకర్యం కల్పిస్తున్నారు. తీవ్రంగా ప్రభావితమైన రాయ్గఢ్, రత్నగిరి జిల్లాలకు రూ.2 కోట్లు చొప్పున, ఇతర జిల్లాలకు రూ.50లక్షల చొప్పున ఆర్థిక సహాయం అందించారు.
రాయ్గఢ్ జిల్లా కొండల్కర్ వాడిలో గవర్నర్ భగత్ సింగ్ కోశ్యారీ పర్యటించి ప్రస్తుత పరిస్థితి, సహాయక చర్యలపై ఆరా తీశారు. కేంద్ర, రాష్ట్ర ప్రభుత్వాలు సంయుక్తంగా ఈ గ్రామస్థులకు పునరావాసం కల్పిస్తుందని భరోసా ఇచ్చారు.
రత్నగిరి- వర్ష బీభత్సానికి వణికిపోయిన చిప్లున్ పట్టణంలో బాధితులకు తక్షణ సహాయం అందించాలని అధికారులను ఆదేశించారు కోశ్యారీ.
సింధుదుర్గ్- భారీ వానలకు జిల్లాలో ఎన్నో జీవితాలు ఛిద్రమయ్యాయి. 39 గ్రామాల్లో 290 కుటుంబాల్లోని 1,271 మందిని సురక్షిత ప్రాంతాలకు తరిలించారు.
కోల్హాపుర్- ఇబ్రహీం బుజ్వాడేలో పౌల్ట్రీ షెడ్డులో వరదల కారణంగా 3,500 పక్షులు బలికాగా, 70 బ్యాగుల ధాన్యం నీటిపాలైంది.
సంగ్లీ- వర్ణ, కృష్ణ నదుల వరద ఉద్ధృతి తగ్గుముఖం పట్టింది. అయినప్పటికీ అనేక గ్రామాలు ఇంకా ముంపులో కొనసాగుతున్నాయి. అయితే వరదల కారణంగా పట్టణాలను మొసళ్ల భయం వెంటాడుతోంది.
సతారా- జిల్లాకు రూ.100కోట్ల ప్రత్యేక నిధులు ప్రకటించారు ఉప ముఖ్యమంత్రి అజిత్ పవార్. మృతుల కుటుంబాలకు రూ.7 లక్షలు ఇస్తామని హామీ ఇచ్చారు. 125 ఏళ్లలోనే మినీ కశ్మీర్గా పేరు గాంచిన మహాబలేశ్వర్లో ఈ ఏడాది రికార్డు స్థాయి వర్షపాతం నమోదైంది. జులై 22, 23న 1,074.04 ఎంఎం వర్షపాతం నమోదైంది.
కేంద్రం సాయం..
మహారాష్ట్రకు వరద సహాయం కింద రూ.701 కోట్లను మంజూరు చేసింది కేంద్రం. కర్ణాటకకు మరో రూ.629 కోట్లు కేటాయించింది.
ఇదీ చూడండి : దిల్లీలో భారీ వర్షాలు- జనజీవనం అస్తవ్యస్తం
