కేరళ రాజధాని తిరువనంతపురంలో మరో ఐదుగురికి జికా వైరస్(Zika virus) సోకినట్లు తేలింది. వారిలో నలుగురు మహిళలు కూడా ఉన్నారు. తాజా బాధితులతో మొత్తం జికా కేసుల సంఖ్య 28కి చేరింది. ఈ మేరకు ఆ రాష్ట్ర ఆరోగ్య మంత్రి వీణా జార్జ్ వెల్లడించారు.
తాజా కేసుల్లో రెండు.. వైరస్ వ్యాప్తికి కేంద్రమైన అనయారాకు మూడు కిలోమీటర్లు దూరంలో బయటపడినట్లు వీణ తెలిపారు. "మొత్తం 21 నమూనాలు పరీక్షించగా.. ఐదుగురికి జికా పాజిటివ్గా నిర్ధరణ అయింది. దీంతో మొత్తం కేసుల సంఖ్య 28కి చేరింది" అని ఆరోగ్య మంత్రి పేర్కొన్నారు.
కరోనా కేసుల్లో పెరుగుదల
మరోవైపు, కేరళలో కరోనా వైరస్(Corona Virus) విజృంభిస్తోంది. ఆ రాష్ట్రం మొదట్లో వైరస్‌ను కట్టడి చేసి ఆదర్శంగా నిలిచింది. కానీ, రెండోదశలో మాత్రం భారీ సంఖ్యలో కొత్త కేసులు వెలుగుచూశాయి. తర్వాత అవి తగ్గినట్టే తగ్గి మరోసారి పెరుగుతుండటం కలవరపెడుతోంది. ఈ నేపథ్యంలో మహమ్మారి కట్టడికి జులై 17, 18 తేదీల్లో పూర్తిస్థాయి లాక్‌డౌన్ విధిస్తూ రాష్ట్రప్రభుత్వం ఆదేశాలు జారీచేసింది. తాజాగా అక్కడ 15వేలమందికి వైరస్ సోకింది.
ఇదీ చూడండి: కరోనాతో కుదేలైన ఆ రాష్ట్రంపై జికా పంజా!
