కరోనాకు టీకాయే సంజీవనిగా ఉన్న వేళ కొన్ని గ్రామాల్లో దానిపై వదంతులు వ్యాపిస్తున్నాయి. వీటితో పలువురు భయభ్రాంతులకు గురవుతున్నారు. ఈ క్రమంలోనే టీకా వేసుకుంటే చనిపోతాననే భయంతో పొదల్లో దాక్కున్నారు ఓ వృద్ధురాలు. ఈ ఘటన రాజస్థాన్లోని చిత్తోడ్గఢ్లో జరిగింది.
ఏం జరిగిందంటే..
కిరత్పురా సమీపంలోని ఓ అడవిలో ఒక వృద్ధురాలి శవం ఉందని పక్కనే పొలాల్లో పనిచేసే వ్యక్తి తమ గ్రామస్థులకు బుధవారం సమాచారం అందించారు. దీంతో సర్పంచ్ ప్రతినిధి నీతిరాజ్ సింగ్ సహా స్థానికులు అక్కడికి చేరుకున్నారు. చూసేసరికి ఆమె ప్రాణాలతోనే ఉన్నారు.
వృద్ధురాలిని బయటకు తీసుకొచ్చేందుకు ప్రయత్నిస్తోండగా.. తనకు టీకా వేయొద్దంటూ చేతులు జోడించి పదేపదే వేడుకున్నారు. వ్యాక్సిన్ తీసుకుంటే తాను చనిపోతానని వారితో చెప్పారు. కాగా, అతి కష్టం మీద ఆమెను బయటకు తీసుకురాగలిగారు.
వదంతుల వల్లే..
కొందరు కావాలనే వ్యాక్సిన్పై దష్ప్రచారం చేస్తున్నారని నీతిరాజ్ అన్నారు. అందుకే ప్రజలు టీకా తీసుకునేందుకు ఆసక్తిగా లేరని చెప్పారు. వదంతులు వ్యాప్తి చేసేవారిపై కఠిన చర్యలు తీసుకోవాలని ప్రభుత్వాన్ని కోరారు.
ఇదీ చూడండి: COVID vaccine: త్వరలో అందుబాటులోకి మరో టీకా!
