చికిత్స అందక ఓ వృద్ధుడు ఆసుపత్రి ఆవరణలోనే ప్రాణాలు కోల్పోయాడు. ఒడిలోనే తుది శ్వాస విడిచిన తండ్రిని చూసి కుమారుడు బోరున విలపించాడు. తండ్రికి వైద్యులు చికిత్స అందిస్తారని ఆస్పత్రి ముందు పడిగాపులు పడిన ఆ కుమారుడు సహా అతని బంధువులు శోకసంద్రంలో మునిగిపోయారు. వైద్యుల నిర్లక్ష్యం కారణంగానే బాధితుడు మృతిచెందాడని బంధువులు ఆరోపిస్తున్నారు. ఈ ఘటన మధ్యప్రదేశ్లోని రతలామ్ జిల్లా జావరా ప్రభుత్వ ఆస్పత్రి వద్ద జరిగింది.
ఇంతకీ జరిగింది ఏంటంటే..
హరియఖేడా గ్రామానికి చెందిన ఓంకార్ లాల్ పటీదార్ (70) శనివారం శ్వాస సంబంధిత సమస్యను ఎదుర్కొన్నాడు. తండ్రి పరిస్థితిని గ్రహించిన అతని కుమారుడు.. బంధువులు సాయంతో కారులో జావరా ప్రభుత్వ ఆస్పత్రికి తీసుకువచ్చాడు. కానీ వైద్యుల కోసం నిరీక్షించినా ఫలితం లేకపోయింది. బాధితుడు ఓంకార్ లాల్ను అతని కుమారుడు తన ఒడిలో పడుకోపెట్టుకుని కారులోనే కూర్చున్నాడు. గంటన్నర తర్వాత పరిస్థితి విషమించి ఓంకార్లాల్ తన కుమారుడి ఒడిలోనే తుది శ్వాస విడిచాడు. తండ్రి మరణంతో కుమారుడి రోదనకు అంతులేకుండా పోయింది.
నిర్లక్ష్యమే కారణం..
ఓంకార్ లాల్ మృతిపట్ల ఆగ్రహం వ్యక్తం చేసిన అతని బంధువులు వైద్య సిబ్బందితో ఘర్షణకు దిగారు. బాధితుడి పరిస్థితిని వివరించి చికిత్స అందించమని వైద్య సిబ్బందికి మొరపెట్టుకున్నా ఎవరూ స్పందించలేదని మృతుడి బంధువులు మండిపడ్డారు. వైద్యుల నిర్లక్ష్యమే ఈ విషాదానికి దారి తీసిందని ఆరోపిస్తున్నారు.
ఘటనాస్థలికి చేరుకున్న పోలీసులు బంధువులకు నచ్చజెప్పి పంపించారు. మృతుడు కరోనాతో చనిపోయి ఉంటాడని అధికారులు అనుమానిస్తున్నారు. మృతదేహానికి అధికారులు కరోనా పరీక్షలు నిర్వహించాల్సి ఉండగా.. బంధువులు శవాన్ని తమ గ్రామానికి తీసుకుపోయారు.
అప్పటికే విషమంగా..
ఈ ఘటనపై వైద్య అధికారులు స్పందించారు. వైద్యులు బాధితుడిని పరిశీలించారని.. అయితే రోగిని ఆస్పత్రికి తీసుకువచ్చిన సమయానికే అతని పరిస్థితి విషమంగా ఉందన్నారు.
ఇదీ చూడండి : ఆంక్షలు బేఖాతరు- అంత్యక్రియలకు వేలమంది హాజరు
