Father Daughter Divorce Procession : కుమార్తెకు 'విడాకుల ఊరేగింపు'.. బ్యాండు బాజాలతో పుట్టింటికి తీసుకొచ్చిన తండ్రి

Father Daughter Divorce Procession : కుమార్తెకు ఘనంగా వివాహం చేసిన ఓ తండ్రి.. అత్తింట్లో అనుభవిస్తున్న బాధలను చూసి తట్టుకోలేక ఆమెను వినూత్నంగా పుట్టింటికి తీసుకొచ్చారు. వివాహం సమయంలో ఊరేగింపు నిర్వహించిన మాదిరిగానే.. బ్యాండు బాజాలు, టపాసుల చప్పుళ్ల మధ్య ఆమెకు స్వాగతం పలికారు.

Father Daughter Divorce Procession : అత్తింట్లో తన కుమార్తె అనుభవిస్తున్న కష్టాలను చూసి తట్టుకోలేక ఓ తండ్రి.. ఆమెను బ్యాండు బాజాల మధ్య ఇంటికి తీసుకొచ్చారు. పెళ్లి ఊరేగింపు నిర్వహించిన విధంగానే సంగీత వాయిద్యాలు, బాణసంచా సందడి మధ్య ఆమెను పుట్టింటికి ఊరేగింపుగా తీసుకొచ్చారు. ఝార్ఖండ్​లోని రాంచీలో ఈ అరుదైన ఘటన జరిగింది. అక్టోబర్ 15న జరిగిన ఈ ఊరేగింపునకు సంబంధించిన వీడియోను తన సోషల్ మీడియాలో పోస్ట్ చేశారు ఆ వ్యక్తి.

వివరాల్లోకి వెళ్తే..
రాంచీలోని కైలాశ్​నగర్ కుమ్​హర్టోలి ప్రాంతంలో నివసించే ప్రేమ్ గుప్తా అనే వ్యక్తి.. గతేడాది ఏప్రిల్ 28న తన కుమార్తె సాక్షి గుప్తాకు వివాహం చేశారు. రాంచీలోని సర్వేశ్వరి నగర్​లో నివసించే సచిన్ కుమార్ అనే వ్యక్తితో ఘనంగా వివాహం జరిపించారు. ఝార్ఖండ్ విద్యుత్ పంపిణీ సంస్థలో అసిస్టెంట్ ఇంజినీర్​గా పనిచేస్తున్న సచిన్.. తన కుమార్తెను తరచూ వేధించేవాడని ప్రేమ్ గుప్తా ఆరోపిస్తున్నారు. వివాహం అయిన కొన్ని రోజులకే వేధింపులు మొదలయ్యాయని అంటున్నారు.

• " class="align-text-top noRightClick twitterSection" data="">

"కొన్నిసార్లు నా కుమార్తెను వారు ఇంటి నుంచి బయటకు పంపించేవారు. సచిన్​కు ఇదివరకే ఓ వివాహం అయిందన్న విషయం నా కుమార్తెకు కొద్ది నెలల క్రితం తెలిసింది. ఇది రెండో వివాహం అని అర్థమైంది. ఈ విషయం తెలిసి మా కాళ్ల కింద భూమి కంపించినంత పనైంది."
-ప్రేమ్ గుప్తా, సాక్షి తండ్రి

టపాసులు కాలుస్తూ..
రెండో వివాహం అని తెలిసినా.. అతడితో బంధం కొనసాగించాలనే తొలుత నిర్ణయించుకున్నానని సాక్షి పేర్కొన్నారు. కానీ, వేధింపులు ఎక్కువ అయ్యేసరికి సచిన్​తో జీవించి ఉండటం సాధ్యం కాదని అనుకున్నట్లు వివరించారు. అందుకే వైవాహిక జీవితానికి వీడ్కోలు పలకాలని తల్లిదండ్రులకు చెప్పినట్లు తెలిపారు. కాగా, ఈ నిర్ణయాన్ని సాక్షి తండ్రి, ఆమె కుటుంబ సభ్యులు స్వాగతించారు. ఆమెను ఇంటికి తీసుకొచ్చేందుకు ఘనంగా ఏర్పాట్లు చేశారు. టపాసులు కాలుస్తూ ఆమెకు పుట్టింటికి స్వాగతం పలికారు.

త్వరలో విడాకులు
తన కుమార్తె వేధింపుల నుంచి విముక్తి పొందిందని, ఆ ఆనందంతోనే ఇలా ఘనంగా ఇంటికి తీసుకొని వచ్చినట్లు సాక్షి తండ్రి ప్రేమ్ గుప్తా వివరించారు. కుమార్తెలు ఎంతో విలువైనవారని, అత్తింట్లో వారికి ఇబ్బందులు ఎదురైతే గౌరవంతో పుట్టింటికి తీసుకురావాలని పేర్కొన్నారు.
ఈ నేపథ్యంలో సచిన్​తో విడాకులు ఇప్పించాలని న్యాయస్థానంలో కేసు దాఖలు చేశారు సాక్షి. కాగా, మెయింటెనెన్స్ ఛార్జీలు చెల్లించేందుకు సచిన్ సైతం అంగీకరించారు. త్వరలోనే వీరిద్దరికీ విడాకులు మంజూరు అయ్యే అవకాశం ఉందని తెలుస్తోంది.