కొత్త సాగు చట్టాలకు వ్యతిరేకంగా దిల్లీ సరిహద్దుల్లో రైతులు ఆందోళనలు చేపడుతున్నారు. వేల మంది రైతులు సరిహద్దుల్లోనే నివాసాలు ఏర్పాటు చేసుకొని నెలల తరబడి నిరసనల్లో పాల్గొంటున్నారు. అయితే.. గాజీపుర్ సరిహద్దులో ఉద్యమిస్తున్న రైతుల సంఖ్య తగ్గుతున్నట్లుగా కనిపిస్తోంది. డిసెంబర్, జనవరిలో ఉన్నంతగా.. ప్రస్తుతం అక్కడ రైతులు లేనట్లుగా తెలుస్తోంది. ఫిబ్రవరి నుంచి భారతీయ కిసాన్ యూనియన్ ప్రతినిధి రాకేశ్ టికాయిత్.. వివిధ రాష్ట్రాల్లో 'మహాపంచాయత్' కార్యక్రమాల్ని నిర్వహిస్తున్నారు. దీని ద్వారా తమ ఆందోళన.. దిల్లీకి మాత్రమే పరిమితం కాదని చెప్పేందుకు ప్రయత్నిస్తున్నారు.
ఈనెల 6న.. గాజీపుర్ సరిహద్దు వద్దకు రాకేశ్ టికాయిత్ చేరుకున్నారు. అక్కడ ఏర్పాటు చేసిన ఓ సభలో పాల్గొన్నారు. అయితే.. సభ చాలా వరకు ఖాళీగా కనిపించింది. రైతులు కొద్ది మందే హాజరవ్వటం పలు సందేహాలకు తావిస్తోంది. దీనిపై రాకేశ్ టికాయిత్ను ప్రశ్నించగా.. పంటల కోత కోసమే రైతులంతా తమ స్వస్థలాలకు వెళ్లారని, త్వరలోనే వారు మళ్లీ తిరిగి వస్తారని చెప్పారు.
"ప్రభుత్వం ఎన్నికల హడావుడిలో ఉంది. అదే విధంగా మా రైతులు.. గోధుమ కోతల కోసం తమ గ్రామాలకు వెళ్లారు. నెల తర్వాత ప్రభుత్వం మళ్లీ దిల్లీకి వస్తుంది. అప్పుడు రైతులు కూడా గాజీపుర్కు తరలివస్తారు. ప్రస్తుతం పంటపనులు చాలా ఉన్నాయి. అందుకే రైతులు ఆ పనుల్లో నిమగ్నమయ్యారు."
-రాకేశ్ టికాయిత్, బీకేయూ నేత
ప్రభుత్వం తీసుకువచ్చిన నూతన సాగు చట్టాలను రద్దు చేయాలని, కనీస మద్దతు ధరకు చట్టబద్ధత కల్పించాలని కోరుతూ వందలాది మంది రైతులు.. గతేడాది నవంబర్ నుంచి దిల్లీ సరిహద్దులో ఆందోళన చేస్తున్నారు.
ఇదీ చూడండి:హరియాణాలో రైతులపైకి జల ఫిరంగుల ప్రయోగం
