దీపావళి అంటే.. టపాసులతో పాటు స్వీట్లు కూడా కచ్చితంగా ఉండాల్సిందే. అందుకే మిఠాయి దుకాణాలు దీపావళి సమయంలో కస్టమర్లతో కళకళలాడుతూ ఉంటాయి. కస్టమర్లను ఆకట్టుకునేందుకు దుకాణదారులు కూడా వివిధ రకాల స్వీట్లను తయారు చేస్తూ ఉంటారు. గుజరాత్ అహ్మదాబాద్లోని ఓ మిఠాయి దుకాణంలో.. దీపావళికి ప్రత్యేకంగా తయారు చేసిన స్వీట్లకు భారీ డిమాండ్ లభిస్తోంది. ఇప్పటికే 10లక్షల స్వీట్లు అమ్ముడుపోయాయి. ఈ స్వీట్ల ధర కేజీకి రూ. 25వేలుగా ఉండటం విశేషం.
వీటి ప్రత్యేకతేంటి?
గోల్డెన్ పిస్తాచియో బాల్, గోల్డెన్ పిస్తాచియో డెసర్ట్పై 24క్యారెట్ల బంగారం పూత ఉంటుంది. వీటిలో అత్యంత ఖరీదైన నౌజా డ్రైఫ్రూట్తో పాటు మామ్రా ఆల్మండ్ను వినియోగిస్తారు. ఈ నౌజా.. ఇరాన్, ఇరాక్, అఫ్గానిస్థాన్ నుంచి దిగుబడి అవుతుంది. ఒక్క కేజీ నౌజా.. దాదాపు రూ. 6వేలు ఉంటుంది. వీటిని తయారు చేసేందుకు టర్కీ నుంచి చెఫ్లను పిలిపించారు. అందుకే ఈ స్వీట్ల ధర కిలో రూ. 25వేలు. పైగా ఈ స్వీట్లు రెండు నెలల వరకు చెక్కుచెదరకుండా ఉంటాయి. ఈ వివరాలను షాపు యజమాని జై శర్మ వెల్లడించారు.
ధర ఎంత ఉన్నా.. మార్కెట్లో మాత్రం ఈ స్వీట్లకు భారీ డిమాండ్ ఉంటోంది. ఇప్పటికే 10లక్షలకుపైగా స్వీట్లు అమ్ముడుపోయాయి. వ్యాపారులు, రాజకీయ నేతలే వీటిని ఎక్కువగా కొంటున్నట్టు తెలుస్తోంది.
మహారాష్ట్రలో..
దీపావళి సందర్భంగా మహారాష్ట్రలోని అమరావతికి చెందిన ఓ స్వీటు షాపు.. సరికొత్త మిఠాయిను తయారుచేసింది. పూర్తిగా 24 క్యారెట్ల బంగారు పూతతో చేసిన స్వీటును 'సువర్ణ కలష్' పేరుతో మార్కెట్లో విక్రయిస్తోంది. దీని ధర కూడా ఎక్కువే. కేజీ స్వీటు ధర రూ.11,000.
మొత్తం 12 కేజీల స్వీటును తయారు చేసినట్లు రఘువీర్ మిఠాయి షాపు నిర్వాహకుడు తేజస్ పోపత్ తెలిపారు. ఇందుకోసం రాజస్థాన్ నుంచి నిపుణుల్ని రప్పించినట్లు వివరించారు. సోమవారం నాటికి 6-7కేజీల స్వీట్స్ను విక్రయించామన్నారు. కొవిడ్-19 కారణంగా గతేడాది ఈ ప్రత్యేక స్వీట్ను తయారు చేయలేదని చెప్పారు రఘువీర్.
ఇదీ చూడండి:- 'మిరపకాయ్ మిఠాయ్' రుచి చూశారా?
