Electricity Bill Scam Message : ప్రస్తుత కాలంలో సాంకేతికతతో కలిగే లాభాలతో పాటు అనేక సమస్యలు ఎదురవుతున్నాయి. గత కొన్నాళ్లుగా సైబర్ నేరగాళ్లు కరెంట్ బిల్లుల పేరుతో స్కామ్లకు పాల్పడుతున్నారు. వారి బారిన పడితే మీ అకౌంట్లో ఉన్న డబ్బును దోచేస్తారు. విద్యావంతులు, నిరక్షరాస్యులు అనే తేడా లేకుండా అందరినీ వారు బురిడీ కొట్టిస్తున్నారు. సైబర్ నేరగాళ్లు చేసే ఫోన్కాల్స్ పట్ల ఎటువంటి జాగ్రత్తలు తీసుకోవాలి? ఒక వేళ వారి నుంచి ఫోన్ వస్తే ఏం చేయాలో ఇప్పుడు తెలుసుకుందాం.
అసలేంటి ఈ విద్యుత్ బిల్లుల స్కామ్?
ఇంటి కరెంట్ బిల్లు వెంటనే చెల్లించాలని.. లేదంటే సరఫరాను నిలిపివేస్తామని సైబర్ నేరగాళ్లు మెసేజ్లు పంపుతుంటారు. అలాంటి వారి చేతిలో చాలా మంది మోసపోతున్నారు. దీనినే విద్యుత్ బిల్లుల స్కామ్గా పిలుస్తున్నారు. ఏయే మార్గాల ద్వారా ఇటువంటి స్కామ్లు జరుగుతున్నాయో తెలుసుకుందాం.
ఫోన్కాల్స్ ద్వారా..
ఈ మధ్య కాలంలో ఆన్లైన్ కరెంట్ బిల్లుల మోసాలు ఎక్కువయ్యాయి. సైబర్ మోసగాళ్లు కరెంట్ బిల్లులు చెల్లించాలని కొంతమందికి ఫోన్ చేస్తుంటారు. కరెంట్ ఆఫీస్ నుంచి కాల్చేస్తున్నామని చెబుతుంటారు. మీ విద్యుత్ బిల్లు బకాయి ఉందని వెంటనే చెల్లించాలి.. లేదంటే కనెక్షన్ కట్ చేస్తామని భయాందోళనలకు గురిచేస్తుంటారు. వెంటనే మీ ఫోన్కు పంపిన లింక్ ద్వారా చెల్లించండని మోసపూరితమైన వెబ్సైట్ లింక్లను పంపుతుంటారు. ఎట్టిపరిస్థితుల్లోనూ అలాంటి నకిలీ లింక్లపై క్లిక్ చేయొద్దు.
వాట్సాప్ మెసేజ్, ఎస్ఎంఎస్లతో..
సైబర్ నేరగాళ్ల ఆన్లైన్ మోసాలకు ఈ మధ్య వాట్సాప్, ఎస్ఎంఎస్లను వేదికగా చేసుకుంటున్నారు. వారు మన ఫోన్కు సందేశాలు పంపి అకౌంట్లో డబ్బులను దోచేస్తున్నారు. " ప్రియమైన వినియోగదారులారా.. మీరు గత నెల చెల్లించిన విద్యుత్ బిల్లు అప్డేట్ అవ్వలేదు. అందువల్ల బిల్లును వెంటనే చెల్లించండి. ఆలస్యమైతే మీ ఇంటికి విద్యుత్ సరఫరాను ఈరోజు రాత్రి 9.30 గంటలకు నిలిపివేస్తాం. మరిన్ని వివరాలకు వెంటనే సంబంధిత అధికారితో మాట్లాడటానికి 82603XXXX42 నంబర్కు సంప్రదించండి." ఇలాంటి మెసేజ్ మీకు వాట్సాప్లో వస్తే.. ఎట్టి పరిస్థితుల్లోనూ ఆ నంబర్లకు ఫోన్ చేయొద్దు.
మోసపూరిత లింక్ల ద్వారా..
ఈ మధ్య ఫోన్లకు మోసపూరిత లింక్లను సైబర్ నేరగాళ్లు పంపుతున్నారు. వాటినే ఫిషింగ్ అటాక్ అంటున్నారు. వారు పెట్టే లింక్లు, మెసేజ్లు అందరినీ నమ్మించేవిగా, మనల్ని కంగారు పెట్టేవిగా ఉంటాయి. వాటిపై క్లిక్ చేయడం వల్ల మన సమాచారం అంతా వారి చేతుల్లోకి వెళ్లే అవకాశం ఉంది. సైబర్ నేరగాళ్ల వలలో పడి చాలా మంది మోసపోతున్నారు.
అప్రమత్తతే.. అతిముఖ్యం
ఇప్పటి వరకు సైబర్ నేరగాళ్లు ఏవిధంగా మోసాలు చేస్తున్నారో తెలుసుకున్నాం. ఇప్పుడు వారి బారిన పడకుండా ఉండాలంటే మనం ఎటువంటి జాగ్రత్తలు తీసుకోవాలో తెలుసుకుందాం.
- మీకు తెలియని వ్యక్తుల నుంచి వచ్చే మెసేజ్లు పట్ల జాగ్రత్తగా ఉండండి.
- సైబర్ నేరగాళ్లు పంపే వెబ్సైట్ లింక్లపై ఎట్టి పరిస్థితుల్లోనూ క్లిక్ చేయొద్దు.
- ఒక వేళ మీకు కరెంట్ బిల్పై సందేహాలుంటే దానిపై ఉన్న ఫోన్ నంబర్కు సంప్రదించండి.
- తెలియని వ్యక్తుల నుంచి వచ్చే లింక్లను ఎట్టి పరిస్థితుల్లోనూ క్లిక్ చేయొద్దు.
- మీకు ఫోన్కు వచ్చిన అనుమానితంగా మెసేజ్ పట్ల జాగ్రత్తలు వహించాలి.
- సైబర్ కేటుగాళ్లు మీకు ఫోన్ చేసినప్పుడు వ్యక్తిగత వివరాలు కూడా అడిగే అవకాశం ఉంది.
- మీ వ్యక్తిగత వివరాలను అపరిచితులకు ఇవ్వవద్దు.
- బ్యాంక్ అకౌంట్ వివరాలు, మీ చిరునామా వివరాలు అపరిచితులకు పంపవద్దు.
Thane Cyber Fraud : భారీ సైబర్ మోసం.. పేమెంట్ గేట్వే హ్యాక్.. రూ.16 వేల కోట్లు స్వాహా!
