మహారాష్ట్రలోని ఏక్‌నాథ్‌ శిందే ప్రభుత్వం మరో 15-20 రోజుల్లో కూలిపోతుందని శివసేన ఉద్ధవ్ ఠాక్రే వర్గం నేత, రాజ్యసభ ఎంపీ సంజయ్ రౌత్ సంచలన వ్యాఖ్యలు చేశారు. మహారాష్ట్ర ప్రభుత్వానికి డెత్ వారెంట్ జారీ అయిందన్నారు. మాజీ సీఎం ఉద్ధవ్ ఠాక్రే శివసేన పార్టీలో తిరుగుబాటు చేసిన 16 మంది ఎమ్మెల్యేలపై అనర్హత వేటువేయాలని సుప్రీంకోర్టులో వేసిన పిటిషన్‌పై మాట్లాడిన సంజయ్ రౌత్ తమకు కచ్చితంగా న్యాయం జరుగుతుందని విశ్వాసం వ్యక్తం చేశారు. ఈ కేసులో సుప్రీంకోర్టు ఆదేశాల కోసమే ఎదురు చూస్తున్నట్లు తెలిపారు. గతేడాది జూన్‌లో ఏక్‌నాథ్‌ శిందే నేతృత్వంలోని 39 మంది ఎమ్మెల్యేలు శివసేన నాయకత్వంపై తిరుగుబాటు చేసి పార్టీని చీల్చారు. దీంతో ఎన్సీపీ, కాంగ్రెస్లతో కూడిన మహావికాస్ ఆఘాడీ ప్రభుత్వం కూలిపోయి భాజపా మద్దతుతో ఏక్‌నాథ్‌ శిందే ముఖ‌్యమంత్రిగా ప్రమాణం చేశారు. ఈ సందర్భంగా విలేకరులతో మాట్లాడిన ఆయన అనర్హత వేటు సహా పెండింగ్లో ఉన్న అనేక పిటిషన్లను ప్రస్తావించారు.
"శిందే ప్రభుత్వానికి ఇప్పటికే డెత్ వారెంట్ జారీ అయింది. కేవలం తేదీని మాత్రమే ప్రకటించాల్సి ఉంది. దానిపై ఎవరు సంతకం చేస్తారనేది కోర్టు తీర్పు తర్వాతే తెలుస్తుంది. ఈ సర్కార్ కూలిపోతుందని నేను ఫిబ్రవరిలోనే చెప్పాను. అయితే న్యాయస్థానం తీర్పులో జాప్యం కారణంగా అది జరగలేదు. మరో 15-20 రోజుల్లో ఈ ప్రభుత్వం కచ్చితంగా కూలిపోతుంది"
- సంజయ్ రౌత్, ఎంపీ
ఎంపీ సుప్రియా సూలే రియాక్షన్!
మాజీ ముఖ్యమంత్రి శివసేన(ఉద్ధవ్ బాలాసాహెబ్ ఠాక్రే) పార్టీ అధినేత ఉద్ధవ్ ఠాక్రే ఆదివారం జల్గావ్ జిల్లాలోని పచోరాలో బహిరంగ సభ ఏర్పాటు చేశారు. ఈ సమావేశానికి సంబంధించిన అన్ని ఏర్పాట్లను సంజయ్ రౌత్ దగ్గరుండి సమీక్షించారు. అయితే, ఈ సభ నేపథ్యంలో శిందే వర్గం ఎమ్మెల్యేలు, మంత్రులు దూకుడు పెంచారు. ఉద్దవ్ వర్గంపై మాటల యుద్ధానికి దిగారు. మంత్రి గులాబ్రావ్ పాటిల్, సంజయ్ రౌత్‌ల పరస్పరం ఘూటు వ్యాఖ్యలు చేసుకున్నారు. ఈ వ్యవహారంపై స్పందించిన ఎన్సీపీ ఎంపీ సుప్రియా సూలే.. అధికార పార్టీ మంత్రులు మాట్లాడిన భాష సరైంది కాదన్నారు. ఇది మహారాష్ట్ర సంస్కృతి కాదని ఆమె అన్నారు. అయితే రాష్ట్రంలో న్యాయ వ్యవస్థ ఎంతగా దిగజారిపోయిందో చెప్పేందుకు ఇదో ఉదాహరణ అని సుప్రియా వ్యాఖ్యానించారు. ఈ విషయంపై పార్లమెంట్‌లో హోంమంత్రి అమిత్‌షాతో చర్చిస్తానని చెప్పారు.
ఇకపోతే జల్గావ్లో జరిగే సభలోనే భవిష్యత్ కార్యాచరణపై నిర్ణయం తీసుకోనుంది ఠాక్రే వర్గం. ఇరువర్గాల మధ్య మాటల యుద్ధం తారాస్థాయికి చేరడం వల్ల అక్కడి రాజకీయ వాతావరణం వేడెక్కింది. ఈ నేపథ్యంలో సభ జరిగే ప్రాంతంతో పాటు పరిసర ప్రాంతాల్లో భద్రతను కట్టుదిట్టం చేశారు పోలీసులు. ఒకే పార్టీకి చెందిన రెండు వర్గాల నాటకీయ పరిణామాల్ని అక్కడి ప్రతిపక్షాల పార్టీలు నిశితంగా గమనిస్తున్నాయి.
